ភ្នំពេញៈ គ្រោះថ្នាក់ចរាចរណ៍មួយបានកើតឡើង បន្ទាប់ពីមានគូសង្សារ១គូ ស្រវឹងស្រាជោកជាំ បើករថយន្តលឿនដូចហោះ បានរេចង្កូតបុកចូលហាងអ៊ុតសក់ ធ្លាយជញ្ជាំងនិងជ្រុលចូលទៅក្នុងផ្ទះ បុកសម្ភារៈក្នុងផ្ទះខូចខាតមួយចំនួនធំ សំណាងល្អម្ចាស់ផ្ទះមិនមានអ្នកណារងរបួស។ ចំណែកអ្នកបើករថយន្តបង្ករងរបួសស្រាល។

គ្រោះថ្នាក់ចរាចរណ៍នេះកើតឡើងកាលពីវេលាម៉ោង៩និង៣០នាទី យប់ថ្ងៃទី២៩ ខែតុលា ឆ្នាំ២០១៧ ស្ថិតនៅតាមបណ្តោយផ្លូវភ្នំពេញហាណូយ ផ្ទះលេខ៤២១(យីហោសុី ណា) ភូមិរោងចក្រ សង្កាត់គោកឃ្លៀង ខណ្ឌសែនសុខ រាជធានីភ្នំពេញ។

យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុគេឃើញគូសង្សារ១គូ បើករថយន្តមួយគ្រឿងម៉ាកកាមរីឆ្លាម ពណ៌ខ្មៅ ពាក់ស្លាកលេខ ភ្នំពេញ 2K-5894 បើកបរក្នុងស្ថានភាពស្រវឹងស្រាជោកជាំ ក្នុងល្បឿនលឿនដូចហោះ ពីជើងទៅត្បូង លុះមកដល់ចំណុចកើតហេតុខាងលើបានរេចង្កូតមកខាងស្តាំ បុកចូលហាងអ៊ុតសក់ ពេញទំហឹង បណ្តាលឲ្យធ្លាយជញ្ជាំងនិងជ្រុលទៅបុកសម្ភារៈអ៊ុតសក់នៅក្នុងហាង រងការខូចខាតមួយចំនួនធំ។ ភ្លាមៗនោះមានស្ត្រីម្នាក់បើកទ្វាររថយន្តរត់គេចខ្លួនបាត់ស្រមោល បន្សល់ទុកតែស្បែកជើងមួយគូនៅនឹងកន្លែងកើតប៉ុណ្ណោះ តែសំណាងល្អម្ចាស់ផ្ទះមិនមានអ្នកណារងរបួសក្នុងហេតុការណ៍នេះទេ ។ ចំណែកអ្នកបើករថយន្តបង្ករងរបួសស្រាល លាយឡំនឹងស្រវឹងស្រាផងនោះ ធ្វើជាសន្លប់ធំត្រូវបានរថយន្តសង្គ្រោះបន្ទាន់ដឹកយកទៅសង្គ្រោះភ្លាមផងដែរ។

ក្រោយកើតហេតុសមត្ថកិច្ចមូលដ្ឋាននិងជំនាញបានចុះមកដល់បានយករថយន្តស្ទូចៗរថយន្តបង្កទៅរក្សាទុកនៅអធិការដ្ឋានខណ្ឌសែនសុខរង់ចាំដោះស្រាយគ្នាទៅតាមផ្លូវច្បាប់បន្តទៀត៕