ស្វាយរៀងៈ បុរស២នាក់រងរបួសបែកក្បាលបាក់ដៃហូរឈាមសន្លប់ស្ដូកស្ដឹងនៅនិងកន្លែង ខណៈកំពុងជិះម៉ូតូស្រាប់តែរថយន្តបានបត់ឆ្វេងខ្វះការប្រុងប្រយ័ត្នហើយចាប់ហ្វ្រាំងមិនទាន់ក៏ជ្រុលបុកយ៉ាងពេញទំហឹងកាលពីវេលាម៉ោង៦និង៣០នាទីព្រឹកថ្ងៃទី៥ ខែមិថុនា ឆ្នាំ២០១៦ ស្ថិតនៅចន្លោះគីឡូម៉ែត្រ ១៣៨-១៣៩ ក្នុងភូមិបន្ទាយ ឃុំកណ្តៀងរាយ ស្រុកស្វាយទាប ខេត្តស្វាយរៀង។

សមត្ថកិច្ចនគរបាលស្រុកឲ្យដឹងថា មុនពេលកើតហេតុមានម៉ូតូម៉ាក ហុងដាសេ១២៥ សេរីឆ្នាំ២០១០ ពណ៌ខ្មៅ ពាក់ស្លាកលេខ ស្វាយរៀង 1C-5700 បើកបរដោយឈ្មោះ អ៊ុក ចន្នី ភេទប្រុស អាយុ២៨ឆ្នាំ មុខរបរកសិករនិងអ្នកអ្នករួមដំណើរឈ្មោះ វ័ន ឆ្នៅ ភេទប្រុស អាយុ២៧ឆ្នាំ មុខរបរកសិករ ដោយអ្នកទាំង២ រស់នៅរស់នៅភូមិថ្មី សង្កាត់ច្រកម្ទេស ក្រុងបាវិត ក្នុងទិសដៅពីកើតមកលិចលើកំណាត់ផ្លូវជាតិលេខ១ ខណៈនោះស្រាប់តែមានរថយន្តម៉ាក starex ពណ៌ទឹកប៊ិច ពាក់ស្លាកលេខ ភ្នំពេញ 2U-4724 បើកបរដោយបុរសម្នាក់មិនស្គាល់ឈ្មោះទិសដៅស្របគ្នាហើយក៏បានបត់ឆ្វេងខ្វះការប្រុងប្រយ័ត្នធ្វើឲ្យម៉ូតូចាប់ហ្វ្រាំងមិនទាន់ក៏ជ្រុលទៅបុកគ្នាពេញទំហឹងតែម្ដង។

ក្រោយកើតហេតុសមត្ថកិច្ចមូលដ្ឋានចុះមកអន្តរាគមន៍យកជនរងគ្រោះមកកាន់មន្ទីរពេទ្យ ព្រមទាំងធ្វើការវាស់វែងនិងអូសម៉ូតូនិងរថយន្តមកកាន់អធិការដ្ឋាននគរបាលស្រុកស្វាយទាប ដោះស្រាយបន្តតាមនីតិវិធី៕