​ពោធិ៍សាត់ៈ លោកវរសេនីយ៍ទោ យិន សាងហៃ អធិការក្រុងពោធិ៍សាត់ បានប្រាប់ Post News ថា មានករណីគ្រោះថ្នាក់ចរាចរណ៍រថយន្តបើករេចង្កូតក្រឡាប់ដោយខ្លួនឯង បណ្តាលឲ្យបុរសម្នាក់ស្លាប់នៅនឹងកន្លែង។

ហេតុការណ៍កើតឡើងនៅវេលាម៉ោង៤ ណិង៤៦នាទីទៀបភ្លឺ ថ្ងៃទី១ ខែវិច្ឆិការ ឆ្នាំ២០១៧ នៅត្រង់ចំណុចមុខប៉ុស្តិ៍រលាប ស្ថិតក្នុងភូមិសាលាគំរូ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។

រថយន្តម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3A-7687 ធ្វើដំណើរពីកើតទៅលិច បើកបរដោយឈ្មោះ ខៀវ ខេមរា ភេទប្រុស អាយុ៣២ឆ្នាំ ស្នាក់នៅភូមិបឹងខ្មារ ឃុំបឹងខ្មារ ស្រុកបាកាន ខេត្តពោធិ៍សាត់ រងរបួសស្រាល និងអ្នករួមដំណើរម្នាក់ទៀតឈ្មោះ ប្រុស ភេទប្រុស ស្នាក់នៅភូមិឃុំជាមួយគ្នា បានស្លាប់នៅនឹងកន្លែង។

លោកវរសេនីយ៍ទោ យិន សាងហៃ អធិការក្រុងពោធិ៍សាត់ បានបញ្ជាក់ពីមូលហេតុ អ្នកបើកបរងងុយដេក។

ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ នាំយករថយន្តមករក្សាទុកនៅនគរបាលក្រុងបណ្តោះអាសន្ន។ ចំណែកសាកសព ជនរងគ្រោះ ត្រូវបានសមត្ថកិច្ចក្រុមគ្រួសារយកទៅធ្វើបុណ្យតាមប្រពៃណី៕