ស្វាយរៀងៈ បន្ទាប់ពីមានករណីករណីឃាតកម្មកាប់សម្លាប់បុរសម្នាក់ជាច្រើនពូថៅបណ្តាលឲ្យស្លាប់កាលពីថ្ងៃទី៤ ខែវិច្ឆិកា​ រួចមក រំលងបានតែ១ថ្ងៃ ពេលនេះឃាតក ខាងលើត្រូវសមត្ថកិច្ចស្រាវជ្រាវបង្ក្រាបនិងចាប់ខ្លួនបានហើយ។

គួរបញ្ជាក់ថា កាលពីវេលាម៉ោង៥និង៣០នាទីល្ងាច ថ្ងៃទី៤ ខែវិច្ឆិកា ឆ្នាំ២០១៧ មានករណីឃាតកម្មមួយបានកើតឡើង ដោយមានជនដៃដល់ បានធ្វើសកម្មភាពកាប់ជនរងគ្រោះឈ្មោះ សូ វ៉ាង អាយុ៦០ឆ្នាំ រស់មានទីលំនៅភូមិស្វាយព្រហួត ឃុំគោកព្រីង ស្រុកស្វាយជ្រំ ខេត្តស្វាយរៀង ចំនួន៤ពូថៅបណ្តាលឲ្យស្លាប់ នៅស្វាយព្រហ៊ូត ឃុំគោកព្រីង ស្រុកស្វាយជ្រុំ ខេត្តស្វាយរៀង រួចមក លោកឧត្តមសេនីយ៍ត្រី កុយ សុភាព ស្នងការរងទទួលផែននគរបាលព្រហ្មទណ្ឌ បានដឹកនាំកម្លាំងជំនាញចុះពិនិត្យដល់កន្លែងកើតហេតុ ឃើញថាជនរងគ្រោះ ត្រូវជនសង្ស័យមិនស្គាល់អត្តសញ្ញាណកាប់ត្រូវចំនួន៤កន្លែង (ត្រូវចំក្បាលផ្នែកខាងក្រោយ១កន្លែង, ត្រូវចំគុម្ព្តចៀកខាងឆ្វេង១កន្លែង, លើចិញ្ចើម១កន្លែង និងបាក់កំភួនដៃខាងឆ្វេង) បណ្តាលឲ្យដេកស្លាប់នៅលើគ្រែក្នុងផ្ទះ។

រហូតដល់ថ្ងៃទី៥ ខែវិច្ឆិកា ឆ្នាំ២០១៧ វេលាម៉ោង៥ល្ងាច សមត្ថកិច្ចស្រាវជ្រាវនិងកំណត់បានមុខសញ្ញាជនសង្ស័យម្នាក់ ឈ្មោះ នួន ណា ហៅ ច្រេះ ភេទប្រុស អាយុ៥៤ឆ្នាំ មុខរបរធ្វើស្រែ រស់នៅភូមិជាមួយគ្នា ដែលត្រូវជាបងប្អូនរបស់ជនរងគ្រោះដើម្បីយកមកធ្វើការសាកសួរ។

នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានប្រព្រឹត្តិអំពើឃាតកម្ម ដោយយកពូថៅកាប់ទៅលើជនរងគ្រោះចំនួន៤ពូថៅ ត្រូវចំក្បាល៣ពូថៅ និង កំភួនដៃ១ពូថៅ បណ្តាលឲ្យស្លាប់នៅលើគ្រែក្នុងផ្ទះពិតប្រាកដមែន មូលហេតុគឺដោយសារ ធ្លាប់មានគំនុំជាមួយគ្នា៕