ភ្នំពេញៈ បុរសម្នាក់បានស្លាប់យ៉ាងអាណោចអាធម៌នៅនិងកន្លែង និងម្នាក់ទៀតបានរងរបួសធ្ងន់ ត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះភ្លាមៗ បន្ទាប់ពីត្រូវបានរថយន្ត១គ្រឿង បើកបុកម៉ូតូខ្លួនកំពុងជិះពេញទំហឹង។

ហេតុការណ៍ថ្នាក់នេះ បានកើតទ្បើងកាលពីវេលាម៉ោង ១១ យប់ថ្ងៃទី១១ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវភ្នំពេញហាណូយ កែងនិងផ្លូវលំមួយកន្លែង ក្នុងភូមិអន្លូងក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

សពជនរងគ្រោះមានឈ្មោះ លី ម៉ៅ ភេទប្រុស អាយុ៣៨ឆ្នាំ មុខរបរ អ្នកបើកបរ ស្នាក់នៅម្តុំកើតហេតុខាងលើ មានស្រុកកំណើត ភូមិគីឡូ៤ ឃុំប៉ោយប៉ែត ស្រុកអូជ្រៅ ខេត្តបន្ទាយមានជ័យ ចំណែកអ្នករងរបួសធ្ងន់ មិនទាន់ស្គាល់អត្តសញ្ញាណនៅទ្បើយទេ។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញបុរសពីនាក់ ជិះម៉ូតូមួយគ្រឿងម៉ាក សេរូស ពណ៌ក្រហម ពាក់ស្លាកលេខ កំពង់ឆ្នាំង1B-3616 ជិះតាមផ្លូវភ្នំពេញហាណូយទិសដៅពីជើងទៅត្បូង លុះមកដល់ផ្លូវលំមួយកន្លែង ត្រង់ចំណុចកើតហេតុ បានបត់ស្តាំបម្រុងចូលទៅកន្លែងស្នាក់នៅ ក៏ត្រូវបានរថយន្តមួយគ្រឿង មិនស្គាល់ម៉ាក បើកតាមផ្លូវលំទិសដៅពីលិចទៅកើត បានបុកម៉ូតូពេញទំហឹង បណ្តាលឲ្យបុរសម្នាក់ស្លាប់ និងម្នាក់ទៀតរបួសធ្ងន់ នៅនិងកន្លែង ខណៈរថយន្តបង្ក មិនព្រមឈប់នោះទេ ដោយព្យាយាមបើករត់គេចខ្លួនបាត់ស្រមោលតែម្ដង បន្សល់ទុកជនរងគ្រោះ នៅនិងកន្លែង និងម៉ូតូខូចខាតផ្នែកខាងមុខយ៉ាងដំណំ។

ក្រោយកើតហេតុសមត្ថកិច្ចជំនាញ បានចុះមកដល់បានវាស់វែង យកម៉ូតូទៅរក្សាទុកនៅអធិការដ្ឋានខណ្ឌសែនសុខ រីឯសពជនរងគ្រោះ ត្រូវបានសមត្ថកិច្ចដឹកយកទៅតម្កល់ទុក នៅវត្តទឹកថ្លា ដើម្បីរងចាំសាច់ញាត្តិមកទទួលយក ទៅធ្វើបុណ្យតាមប្រពៃណី៕