Post News Media ព័ត៌មានជាតិ បុរសមិនស្គាល់...

បុរសមិនស្គាល់អត្តសញ្ញាណម្នាក់ ជិះម៉ូតូយ៉ាងលឿន បត់ឆ្វេងមិនប្រយ័ត្ន បុកបង្កាន់ដៃស្ពាន ធ្លាក់ទៅក្រោមស្លាប់ភ្លាមៗ

កណ្ដាល: តាមសមត្ថកិច្ច នៅថ្ងៃទី១២ ខែវិច្ឆិកា ឆ្នាំ២០១៧ បានឲ្យដឹងថា មានករណីគ្រោះថ្នាក់ចរាចរណ៍មួយ រវាងម៉ូតូជិះដួលដោយខ្លួនឯង នៅលើស្ពានព្រែកក្តាម បណ្តាលឲ្យស្លាប់មនុស្សម្នាក់។

ហេតុគ្រោះថ្នាក់នេះ បានកើតទ្បើងនៅវេលាម៉ោង ១០ និង៥០ នាទីយប់ថ្ងៃទី១១ ខែវិច្ឆិកា ឆ្នាំ២០១៧ ស្ថិតនៅចំណុចលើស្ពានមិត្តភាពកម្ពុជាចិន (ស្ពានព្រែកក្តាម) ស្រុកពញាឮ ខេត្តកណ្ដាល។

តាមសមត្ថកិច្ច បានឲ្យដឹងថា នៅថ្ងៃខែកើតហេតុខាងលើ មានបុរសមិនស្គាល់អត្តសញ្ញាណម្នាក់ ជិះម៉ូតូ១គ្រឿង ម៉ាក City សេ១០០ កូរ៉េ ពណ៌ទឹកប៊ិច គ្មានស្លាកលេខ បើកបរក្នុងទិសដៅពីជើងឡើងលើដៃស្ពាន បត់ឆ្វេងទៅកើតមិនប្រយ័ត្ន បានប៉ះជាមួយបង្កាន់ដៃស្ពាន បង្កឲ្យម៉ូតូបោកដួលនៅលើស្ពានខ្ទាត់ អ្នកបើកបរធ្លាក់ពីលើស្ពាន ទៅក្រោមបណ្តាលឲ្យស្លាប់ភ្លាមៗនៅនឹងកន្លែង។

បច្ចុប្បន្នសមត្ថកិច្ច កំពុងបន្តស្រាវជ្រាវរកសាច់ញាតិជនរងគ្រោះ និងបានយកវត្ថុតាងមករក្សាទុក នៅប៉ុស្តិ៍នគរបាល ដើម្បីរងចាំការដោះស្រាយតាមនិតិវិធី នៅពេលក្រោយ៕