រតនគិរី: កាលពីវេលាម៉ោង១២យប់ ថ្ងៃទី១៤ ខែវិច្ឆិកា ឆ្នាំ២០១៧ មានករណីគ្រោះថ្នាក់ចរាចរណ៍មួយបានកើតឡើង រវាងម៉ូតូនិងម៉ូតូ បណ្តាលឲ្យរបួសធ្ងន់ចំនួន៥នាក់ និងស្លាប់ម្នាក់ភ្លាមៗនៅនឹងកន្លែងកើតហេតុ នៅត្រង់ចំណុចចុះទូល ស្ថិតក្នុងភូមិវ៉ង ឃុំប៉ូយ ស្រុកអូរជុំ ខេត្តរតនគិរី។

ប្រភពពីសមត្ថកិច្ច បានឲ្យដឹងថា ជនរងគ្រោះឈ្មោះ ស្រន តាវលឿ ភេទប្រុស អាយុ១៧ឆ្នាំ ជនជាតិគ្រឹង ស្នាក់នៅភូមិតាង៉ាច ឃុំប៉ូយ ស្រុកអូរជុំ ខេត្តរតនគិរី មុខរបរកសិករ(ស្លាប់) និងអ្នករួមដំណើរ២នាក់(រងរបួសធ្ងន់) ចំណែកឯជនបង្កមិនត្រូវបានស្គាល់អត្តសញ្ញាណច្បាស់(របួសធ្ងន់)ជិះម៉ូតូម៉ាកស៊ីរូស។

ប្រភពដដែល បានបន្តថា មុនពេលកើតហេតុ គេឃើញម៉ូតូទាំង២គ្រឿងខាងលើ បានធ្វើដំណើរបញ្រ្ចាសទិសគ្នា ទើបបង្កឲ្យបុកគ្នាពេញមួយទំហឹង បណ្តាលឲ្យស្លាប់ម្នាក់ភ្លាមៗ និងរបួសធ្ងន់ចំនួន៥នាក់ រួចយកទៅសង្រ្គោះបន្ទាន់នៅឯមន្ទីរពេទ្យបង្អែកខេត្ត។

ក្រោយកើតហេតុ សមត្ថកិច្ចបាននាំយកវត្ថុតាងទាំង២គ្រឿង មករក្សាទុកនៅប៉ុស្តិ៍ដើម្បីស្រាវជ្រាវបន្ត។ រីឯសាកសពត្រូវបញ្ជូនទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី៕

​