មុខងារថតចម្លងរូបភាពលើផ្ទៃអេក្រង់ទូរសព្ទ iPhone ឬ iPad ដើរលើប្រព័ន្ធ iOS 11 ជាវីដេអូ ឬហៅថា Screen Recording ដោយមិនចាំបាច់ត្រូវការកម្មវិធីជំនួយ គឺពិតជាពិសេសហើយ។ ប៉ុន្តែ អ្វីដែលពិសេសជាងនេះ និងដែលប្រិយមិត្តភាគច្រើនមិនធ្លាប់ដឹងនោះគឺ វាអាចថតជាប់ទៅជាមួយខ្សែអាត់សំឡេងបាន តាមរយ:គន្លឹះសម្ងាត់មួយ ដែល Post Tech សូមបង្ហាញជូនដូចខាងក្រោម៖

1- ជាដំបូង សូមដាក់បញ្ចូលរូបតាងមុខងារ Screen Recording ទៅលើផ្ទាំង Control Center ជាមុនសិន (បើមិនទាន់ដាក់) ដោយចូលទៅកាន់កម្មវិធី Settings -> Control Center -> More Controls ហើយអូសផ្ទាំងអេក្រង់ចុះក្រោម ទៅកាន់ Screen Recording។ បន្ទាប់មក ចុចលើរូបសញ្ញា + ពណ៌បៃតង ដែលឋិតនៅខាងឆ្វេងដៃរបស់វា។

2- ជំហានបន្ត សូមបិទកម្មវិធី Settings ចោល រួចអូសផ្ទាំង Control Center ពីផ្នែកខាងក្រោមនៃអេក្រង់ចេញឡើងលើ រួចចុចលើប៊ូតុង Screen Recording ដែលមានរូបសញ្ញាមូលៗ (មើលរូប) ហើយបន្ទាប់ពីវាលោតទៅជាពណ៌ក្រហម (បានសេចក្តីថាវាកំពុងដំណើរការថតអេក្រង់) សូមចុចសង្កត់ជាប់លើរូបនោះរហូតដល់ផ្ទាំងថតខ្សែអាត់សំឡេងមួយលេចចេញ។ សូមចុចលើប៊ូតុងរូបសញ្ញាក្បាលមេក្រូ នោះទូរសព្ទ iPhone របស់លោកអ្នកនឹងចាប់ផ្តើមស្រូបថតយកសំឡេងបញ្ចូលទៅក្នុងវីដេអូថតអេក្រង់ភ្លាមៗតែម្តង។

3- ដើម្បីបញ្ឈប់ដំណើរការថតអេក្រង់ ក៏ដូចជាសំឡេង លោកអ្នកអាចចុចលើរបារផ្នែកខាងលើអេក្រង់ រួចចុច Stop ហើយភ្លាមៗនោះ រូបភាពវីដេអូអេក្រង់ដែលបានថតនឹងបញ្ជូនទៅផ្ទុកក្នុងកម្មវិធី Photos ដោយស្វ័យប្រវត្តិតែម្តង៕