ភ្នំពេញៈ ប្តីប្រពន្ធមួយគូ បើករថយន្តចេញពីមង្គលការ ជ្រុលទៅបុករថយន្តមួយគ្រឿង នៅខាងមុខបណ្តាលឲ្យខូចខាតបន្តិចបន្តួច ព្យាយាមបើករត់ត្រូវគេបើកដេញឃាត់បានមកវិញតែមិនបង្កឲ្យមានអ្នករងរបួសនោះទេ។

ហេតុការណ៍នេះកើតឡើងកាលពីវេលាម៉ោង៩និង៣០នាទីយប់ថ្ងៃទី១៩ ខែវិច្ឆិកា ឆ្នាំ២០១៧ ស្ថិតនៅតាមបណ្តោយផ្លូវ២០០៤ ស្តុបវត្តអង្កតាមិញ ក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

មុនកើតហេតុ គេឃើញប្តីប្រពន្ធមួយគូ បើករថយន្តមួយគ្រឿងម៉ាកឡិចសុីស RX៣០០ ពណ៌ខ្មៅ ពាក់ស្លាកលេខ ភ្នំពេញ 2L-1185 ទើបនឹងចេញពីពិធីមង្គលការបើកបរពីលិចទៅកើតបំណងបើកត្រឡប់ទៅផ្ទះ លុះមកដល់ចំណុចកើតហេតុខាងលើ ដោយខ្លួនស្រវឹងស្រឿងៗផងនោះ បានជ្រុលចង្កូតទៅបុករថយន្តកូរ៉េមួយគ្រឿងម៉ាកKIA ពណ៌ខ្មៅ ពាក់ស្លាកលេខ ភ្នំពេញ 2AQ-2966 បើកបរដោយស្ត្រីម្នាក់ រួមដំណើរនិងកូន បើកនៅខាងមុខបណ្តាលឲ្យបែកកាងខាងក្រោយខាងស្តាំបន្តិចបន្តួច តែមិនបានឈប់ដោះស្រាយនោះទេ បានព្យាយាមបើករត់ត្រូវបានម្ចាស់រថយន្តរងគ្រោះបើកដេញចាប់បាននៅចំណុចមុខ វីឡាអ័រគីដេ តាមបណ្តោយផ្លូវ២០០៤ ក្នុងសង្កាត់អូរបែកក្អម ខណ្ឌសែនសុខ បានឃាត់រថយន្តបង្កបានតែម្តង ហើយម្ចាស់រថយន្តរងគ្រោះបានទាក់ទងទៅសមត្ថកិច្ចភ្លាមៗដែរ។

ក្រោយកើតហេតុសមត្ថកិច្ចខណ្ឌសែន បានចុះមកដល់កន្លែងកើតហេតុដោយបានឲ្យរថយន្តទាំង២គ្រឿងសម្របសម្រួលគ្នា ដោយភាគីខាងម្ចាស់រថយន្តបង្កបានចេញសំណងជួលជុលទៅរថយន្តរងគ្រោះទាំងអស់ ដើម្បីបញ្ចប់រឿងនៅនឹងកន្លែងកើតហេតុតែម្តង៕