ស្ទឹងត្រែងៈ មានករណីគ្រោះថ្នាក់ចរាចរណ៍មួយ រវាងរថយន្តស៊ាំយ៉ុងបានបុកជាមួយម៉ូតូសង់១២៥ កំពុងជិះដោយបុរសម្នាក់ឌុបកូនស្រី បណ្តាលឲ្យបុរសជាឪពុកស្លាប់ ចំណែកកូនស្រីរបួសស្រាល ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះកើតឡើងកាលពីវេលាម៉ោង២និង២០នាទី ថ្ងៃទី២៦ ខែវិច្ឆិកា ឆ្នាំ២០១៧ ស្ថិតនៅចំណុចផ្លូវបំបែកជាបួន ផ្លូវជាតិលេខ៩ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។

ជនរងគ្រោះដែលស្លាប់មានឈ្មោះ ប្រាក់ បេន ភេទប្រុស អាយុ៥៨ឆ្នាំ មុខរបរកសិករ ស្នាក់នៅភូមិកាំងមេម៉ាយ ស្រុកព្រះបាទ ក្រុងស្ទឹងត្រែង ខេត្តស្ទឹងត្រែង (ជាអ្នកបើកម៉ូតូ)​ ចំណែកកូនស្រី របួសស្រាល។

ប្រភពព័ត៌មានបានឲ្យដឹងថា គ្រោះថ្នាក់ចរាចរណ៍នេះ កើតឡើងរវាងរថយន្តម៉ាកស៊ាំយ៉ុង ពណ៌ស ពាក់ស្លាកលេខ ភ្នំពេញ 2A-8314 បើកពីលិចទៅកើត ក្នុងល្បឿនលឿន បានបុកជាមួយនឹងម៉ូតូសង់១២៥ ពណ៌ខ្មៅ ពាក់ស្លាកលេខ ស្ទឹងត្រែង 1A-6381 ដែលកំពុងបើកពីលិចទីកើត បត់ទៅខាងជើង ដែលកំពុងជិះដោយបុរសម្នាក់ឌុបកូនស្រី បណ្តាលឲ្យស្លាប់ឪពុកយ៉ាងរន្ធត់។ ចំណែកកូនស្រីរបួសស្រាល។ បន្ទាប់ពីកើតហេតុភ្លាមៗ អ្នកបើករថយន្តបង្កបានចុះគេចខ្លួនបាត់ស្រមោល ដោយបន្សល់ទុករថយន្តនៅនឹងកន្លែង។

ក្រោយកើតហេតុ សមត្ថកិច្ចបានវាស់វែង យករថយន្តទៅរក្សាទុកនៅអធិការដ្ឋាននគរបាលស្រុករង់ចាំដោះស្រាយគ្នាតាមច្បាប់បន្តទៀត។ ចំណែកសពបានប្រគល់ឲ្យក្រុមគ្រួសារធ្វើបុណ្យតាមប្រពៃណី៕