បន្ទាយមានជ័យៈ បទល្មើស៣ករណី ត្រូវបានកម្លាំងនគរបាលក្រុងប៉ោយប៉ែត ធ្វើការបង្ក្រាបជាបន្តបន្ទាប់ ក្នុងរយៈពេលតែ១ថ្ងៃ ដោយឃាត់ខ្លួនបានជនសង្ស័យ៥នាក់ ។

លោក ធិន ស៊ិនដេត អធិការនគរបាលក្រុងប៉ោយប៉ែត បានឲ្យដឹងថា ក្រោយទទួលបានសេចក្តីរាយការណ៍ពី ប្រជាពលរដ្ឋ និងម្ចាស់ផ្ទះសំណាក់ ពីបទល្មើស នៅថ្ងៃទី២៨ ខែវិច្ឆិកា ឆ្នាំ២០១៧ លោកបានបញ្ជាកម្លាំងចុះស្រាវជ្រាវបង្ក្រាប និងបង្ក្រាប ជាបន្តបន្ទាប់នូវបទល្មើសគ្រឿងញៀន ចំនួន៣ករណី លើទីតាំងផ្សេងៗគ្នា ដោយឃាត់ខ្លួនបានជនសង្ស័យ៥នាក់ រួមមាន ៖ ១-ឈ្មោះ ថូ វិត ភេទ ប្រុស អាយុ ៣១ឆ្នាំ ២-ឈ្មោះ ឆុន រ៉េត ភេទប្រុស អាយុ៤០ឆ្នាំ ៣-ឈ្មោះ ឆាយ ភក្តី ភេទប្រុស អាយុ៣៧ឆ្នាំ ៤-ឈ្មោះឆាយ ម៉ៅ ចិត្ត ភេទប្រុស អាយុ៣៩ឆ្នាំ ៥-ឈ្នោះ តាន់ សុភក្រ័ ភេទប្រុស អាយុ១៩ឆ្នាំ អ្នកទាំង៥ មានទីលំនៅក្នុងក្រុងប៉ោយប៉ែត ខេត្តបន្ទាយមានជ័យ ។

ក្នុងប្រតិបត្តិការបង្ក្រាបនេះ កម្លាំងបានដកហូតវត្ថុតាងមួយចំនួនដូចជា ៖ គ្រឿងញៀនប្រភេទម៉្សៅក្រាមពណ៌សថ្លា ចំនួន១០កូនថង់តូច និង១ថង់ធំ រថយន្ត១គ្រឿង ម៉ាក Camry បាឡែន ពណ៌ស្ករ ស្លាកលេខ 2k 6501 ផលិតឆ្នាំ2002 ទូរសព្ទដៃ៤គ្រឿង ប័ណ្ណសម្គាល់ខ្លួន និងសម្ភារៈប្រើប្រាស់គ្រឿងញៀនមួយចំនួនទៀតផងដែរ ។

លោកថា ជនសង្ស័យទាំង៥នាក់ ក្រោយឃាត់ខ្លួន ត្រូវបានកម្លាំងជំនាញ បញ្ជូនទៅស្នងការនគរបាលខេត្តបន្ទាយមានជ័យ ហើយបច្ចុប្បន្នក៏កំពុងត្រូវបានកម្លាំងការិយាល័យជំនាញ កសាងសំណុំរឿងបញ្ជូនបន្តទៅតុលាការ ចាត់ការតាមនីតិវិធីច្បាប់ ៕