ភ្នំពេញ: ជនសង្ស័យចំនួន២នាក់ប្តីប្រពន្ធ ដែលជាគ្រូមន្ដអាគមអូមអាម ត្រូវបានកម្លាំងការិយាល័យព្រហ្មទណ្ឌកម្រិតធ្ងន់ នៃនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ ចូលទៅធ្វើការឃាត់ខ្លួន កាលពីរសៀលថ្ងៃទី២៨ ខែវិច្ឆិកា ឆ្នាំ២០១៧ នៅចំណុចផ្ទះវីឡាលេខ០៦ ផ្លូវQ០១ ភូមិកោះអណ្តែត សង្កាត់ទួលសង្កែ២ ខណ្ឌឬស្សីកែវ បន្ទាប់ពីទទួលបានពាក្យបណ្ដឹងពីជនរងគ្រោះ ពីបទរំលោភលើទំនុកចិត្ត និងញ៉ុះញង់រៀបគម្រោងឆបោក អ្នករកស៊ីសង់ផ្ទះល្វែង យកប្រាក់អស់ប្រមាណជិត១លានដុល្លាររួចនោះ។
ប្រតិបត្តិការនេះធ្វើឡើងដោយមានការសម្របសម្រួលពីលោក សៀង សុខ ព្រះរាជ្ញារងអមសាលាដំបូងរាជធានីភ្នំពេញ និងដឹកនាំកម្លាំងដោយផ្ទាល់ពីលោកវរសេនីយ៍ឯក ជាវ វិបុល នាយការិយាល័យនគរបាលព្រហ្មទណ្ឌកម្រិតធ្ងន់ នៃនាយកដ្ឋានក្រសួងមហាផ្ទៃ។
ជនរងគ្រោះដែលត្រូវជនសង្ស័យជាគ្រូមន្តអាគមឆបោកមានឈ្មោះ អាំង គីហេង ភេទប្រុស អាយុ៤៦ឆ្នាំ ជាពាណិជ្ជករ និងប្រពន្ធឈ្មោះ ទិត្យ ផល្លា អាយុ៣៣ឆ្នាំ ជាពាណិជ្ជករ ស្នាក់នៅភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។ រីឯជនសង្ស័យដែលត្រូវឃាត់ខ្លួនមានឈ្មោះ សុន ឆ័យ អាយុ៤៤ឆ្នាំ ជាប្តី និងប្រពន្ធ ដែលជាគ្រូទាយធ្វើមន្តអាគមស្នងរូបយាយម៉ៅឈ្មោះ លី ម៉ាណា (ហៅលី ហ្គិចហៀក) អាយុ២៦ឆ្នាំ។ អ្នកទាំង២ មានលំនៅ ក្នុងភូមិគ្រឹះ ដែលសមត្ថកិច្ចឃាត់ខ្លួន។
ជនរងគ្រោះបានបញ្ជាក់ថា ចំនួនទឹកប្រាក់ ដែលយាយគ្រូបោក សរុបទាំងអស់ចំនួន ប្រមាណជិត១លានដុល្លារ ដែលក្នុងនោះថ្លៃរៀបចំធ្វើកិច្ចចំនួន ជាង៣៥ម៉ឺនដុល្លារ ថ្លៃជើងសារ១០ភាគរយជាង៤២ម៉ឺនដុល្លារ ព្រមទាំងថ្លៃនាំដើរលេង ហើយរៀបចំគម្រោងឲ្យធ្វើវិឡា អសាន:មានតម្លៃ ប្រមាណជាង១លានដុល្លារ ក្នុងទំហំផ្ទៃដីជាង២ពាន់ម៉ែត្រការ៉េ នៅប៉ោយប៉ែត មានតម្លៃប្រមាណ២លានដុល្លារ និងផ្ទះ៤ល្វែង មានតម្លៃប្រមាណជាង៤០ម៉ឺនដុល្លារ និងក្រុមហ៊ុនផងដែរ ដែលសរុបទាំងអស់ប្រមាណ៥លានដុល្លារទៀត តែ មិនបានសម្រេច ដោយសារតែគាត់ដឹងខ្លួន និងបែកការណ៍ទៅហើយ។
ប្រភពបន្តថា ក្រៅពីជនរងគ្រោះទាំង២នាក់ប្ដីប្រពន្ធ ត្រូវចាញ់បោកលោកយាយគ្រូអូមអាម លី ម៉ាណា (ហៅ លី ហ្គិចហៀក) ដែលជាអ្នកស្នងរូបយាយម៉ៅ និងប្តីឈ្មោះ សុន ឆ័យ នៅមានមនុស្សជាច្រើនទៀត ដែលបានទៅរកគ្រូមន្ដអាគមឲ្យជួយ និងចាញ់បោកជាហូរហែផងដែរ។
បច្ចុប្បន្ន ជនសង្ស័យទាំង២នាក់ប្តីប្រពន្ធ ត្រូវបានសមត្ថកិច្ចបញ្ជូនទៅតុលាការហើយនៅព្រឹកថ្ងៃទី៣០ ខែវិច្ឆិកា ឆ្នាំ២០១៧នេះ៕
មតិយោបល់