​ភ្នំពេញ: តំណាងក្រុមហ៊ុនផែស្ងួត តិច ស្រ៊ុន ធ្វើការចាប់ខ្លួន បុរសដែលជាអ្នកបើកបររថយន្តដឹកកុងតឺន័រម្នាក់ កាលពីវេលាម៉ោង៣និង ៤៥នាទីរសៀល ថ្ងៃទី៤ ខែធ្នូ ឆ្នាំ២០១៧ រួចបាននាំយកទៅប្រគល់ឲ្យនគរបាលប៉ុស្ដិ៍ចោមចៅ៣ ធ្វើការសាកសួរ ក្រោយពេលដឹងថាជននោះធ្វើសកម្មភាព ដោះដូរកង់រថយន្តដោយបានឃុបឃិតគ្នាជាមួយជាង ដោះយកកង់ថ្មីដែលក្រុមហ៊ុនទើប ទិញដាក់ទៅដូរយកកង់ចាស់១ទឹក ដាក់ចូលជំនួសវិញហើយជាងថែមលុយឲ្យមួយគ្រាប់៧០ដុល្លារ។

បុរសអ្នកបើកបររថយន្តម្នាក់នោះឈ្មោះង៉ាំ មន អាយុជិត៤០ឆ្នាំ មានទីលំនៅក្នុងខេត្តតាកែវ និងបានស្នាក់នៅក្នុងក្រុម ហ៊ុនផែស្ងួតតិច ស្រ៊ុន ស្ថិតនៅតាមបណ្ដោយ ផ្លូវជាតិលេខ៤ ក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។

តាមនគរបាលបានប្រាប់ឲ្យដឹងថា ករណីលួចប្ដូរកង់រថយន្តនេះបានកើតឡើង កាលពីប៉ុន្មានថ្ងៃមុនកន្លងមកនេះ នៅក្នុងភូមិសាស្រ្ត ខេត្តព្រសីហនុ និងស្រុកភ្នំស្រួច ខេត្តកំពង់ស្ពឺ។ នៅមុនពេលកើតហេតុ ជនសង្ស័យបានបើកបររថយន្តដឹកកុងតឺន័រ ១គ្រឿង ចេញពីកំពង់ផែខេត្តព្រះសីហនុ ចូលមមភ្នំពេញ លុះពេលបើកចេញពីទីរួមខេត្តព្រះសីហនុ បានចម្ងាយប្រមាណជិត៣ គីឡូម៉ែត្រ ក៏បានឈប់នៅកន្លែងជាងប៉ះកង់ រថយន្តមួយកន្លែង។ បន្ទាប់មកបានដោះយកកង់ថ្មី១គ្រាប់ពីរថយន្តកុងតឺន័រ ដែលខ្លួនបើកបរហើយ ដូរកង់រថយន្ត១ទឹកដែលជាងដាក់លក់មកដាក់ជំនួសវិញ ហើយជាងបានថែមលុយចំនួន៧០ដុល្លារ បន្ទាប់មកទើបចេញដំណើរបន្តមកភ្នំពេញ។

ប្រភពដដែលបានបន្តទៀតថា ពេលបើកបរទៅដល់ស្រុកភ្នំស្រួច ជនសង្ស័យបានឈប់នៅ ដោះដូរកង់ថ្មី១គ្រាប់ចេញ ទៀតដោយដាក់ជំនួសនូវកង់ចាស់១ទឹកចូល ហើយជាងបានថែមលុយឲ្យចំនួន៧០ដុល្លារទៀត។ ក្រោយមកទើបបន្តដំណើរចូល មកភ្នំពេញយករថយន្តចូលទៅទុកនៅក្នុងផែស្ងួតតិច ស្រ៊ុន ហើយធ្វើមិនដឹងខ្លួនដោយនឹកស្មានថា គ្មានរឿងអ្វីកើតឡើងចំពោះខ្លួន នោះទេ។ ប៉ុន្តែរហូតដល់វេលារសៀលថ្ងៃទី៤ ខែធ្នូ តំណាងក្រុមហ៊ុនបានពិនិត្យមើលរថយន្ត ហើយបានដឹងថាបាត់កង់ថ្មីដែលទើប ដូរដាក់ ស្រាប់តែឃើញសុទ្ធតែកង់ចាស់ទើបធ្វើការឃាត់ខ្លួនអ្នកបើកបររូបនោះ សួរនាំហើយបានដឹងថារូបគរបានដោះដូរកង់ រថយន្តនោះមែន។ពេលនោះ ទើបក្រុមហ៊ុនសំណូមពរឲ្យនគរបាលចាត់ការតាមច្បាប់ ហើយនៅវេលាល្ងាចថ្ងៃដដែល នោះ នគរបាលប៉ុស្ដិ៍ចោមចៅ៣ បានបញ្ជូនជននោះទៅកាន់ខេត្តព្រះសីហនុវិញតាមរថយន្តរបស់តំណាងក្រុមហ៊ុន ដើម្បីឲ្យនគរបាលខេត្តព្រះសីហនុចាត់ការតាមច្បាប់វិញ៕