ភ្នំពេញៈ ជម្លោះរវាងមន្ត្រីអាវុធហត្ថម្នាក់ និងបុរសជាអ្នករត់រម៉កពិការជើង បានផ្ទុះជម្លោះដាក់គ្នាយ៉ាងខ្លាំង រហូតខាងប៉េអឹមបានដកកាំភ្លើងមកគំរាម។
ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង១២ និង៤៥នាទីរំលងអធ្រាត្រ ឈានចូលថ្ងៃទី៧ ខែធ្នូ ឆ្នាំ២០១៧ ស្ថិតនៅផ្លូវលំ ក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
តាមសេចក្តីរាយការណ៍បានបន្តទៀតថា បុរសជាអ្នករត់រម៉កម៉ូតូ មិនបានស្គាល់ឈ្មោះនោះទេ រស់នៅផ្ទះជួលក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ ។ រីឯបុរសជាមន្ត្រីអាវុធហត្ថជិះម៉ូតូម៉ាក និច ពណ៌ស អត់ស្លាកលេខ បើកកាត់មុខបន្ទប់ជួលរបស់បុរសអ្នករត់រម៉កម៉ូតូ ។
តាមប្រភពពីបុរសអ្នករត់រម៉កម៉ូតូបាននិយាយថា មុនពេលកើតហេតុ គាត់បានរយែរម៉កម៉ូតូដាក់នៅមុខផ្ទះជួល ស្រាប់តែបុរសដែលអះអាងថា ខ្លួនជាប៉េអឹមបានស្រែកដាក់គាត់ ធ្វើឱ្យគាត់ខឹង ហើយបានស្រែកតបទៅវិញ បង្កឲ្យប៉ះសម្តីគ្នាហើយត្រូវបុរសប៉េអឹមនោះ បានដកកាំភ្លើងរ៉ូឡូមកគំរាមរូបគាត់ថា អញប៉េអឹម ឯងចង់ខ្លាំងអី តែរូបគាត់មិនខ្លាចឡើយ ទោះគាត់ពិការជើងទាំង២ក៏ដោយ ក៏គាត់មិនខ្លាចដែរ ហើយបានឱ្យប្រពន្ធរត់ទៅប្តឹងសមត្ថកិច្ចផងដែរ ។
បើតាមសម្តីអាវុធហត្ថក៏បាននិយាយវិញដែរថា នៅមុនពេលកើតហេតុ រូបគាត់ទើបចេញមកពីកម្មវិធីផ្ទះមិត្តភក្តិ ហើយបានត្រឡប់ទៅគោលដៅនៅទួលគោកវិញ ។ លុះមកដល់ចំណុចកើតហេតុ ស្រាប់តែឃើញបុរសរត់រម៉កម៉ូតូមានជម្លោះជាមួយគ្រួសារ ហើយគាត់បានលាន់មាត់ ហ៊ឺដាក់
រម៉កម៉ូតូបិទទទឹងផ្លូវ។ បន្ទាប់មក បុរសរត់រម៉កម៉ូតូបានស្រែកដាក់គាត់ថា «ម៉េចឯងថាម៉េច មើលឈប់សិន» បន្ទាប់មក រូបគាត់បានឈប់ម៉ូតូ ហើយដើរទៅសួរនាំ ចង់ម៉េច ក៏បានទាស់សម្តីគ្នា ដោយភាគីបុរសរត់រម៉កម៉ូតូបានយកដុំថ្មរកគប់គាត់ ទើបគាត់បានដកកាំភ្លើង តែមិនបានគំរាមឡើយ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅ បានមកសម្របសម្រួលនៅកន្លែងកើតហេតុ ដោយស្វែងយល់ទាំងសងខាង គឺចង់ឈ្នះរៀងៗខ្លួន។ ចំណែកប្រពន្ធបុរសរត់រម៉កម៉ូតូ បានសុំឲ្យសមត្ថកិច្ចជួយសម្រួល ដោយមិនឱ្យប្តឹងប្តល់គ្នាឡើយ៕
មតិយោបល់