កំពង់ធំៈ លោកប្រធានការិយាល័យចរាចរណ៍ នៃស្នងការនគរបាលខេត្តកំពង់ធំ បានប្រាប់Post Newsថា មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង រវាងម៉ូតូបើកបុករថយន្ត បណ្តាលឲ្យភាគីខាងម៉ូតូស្លាប់ ខណៈបញ្ជូនដល់មន្ទីរពេទ្យ។

ហេតុការណ៍នេះបានកើតឡើង កាលពីវេលាម៉ោង១២និង៤៥នាទីរសៀល ថ្ងៃទី១៣ ខែធ្នូ ឆ្នាំ២០១៧ ស្ថិតលើកំណាត់ផ្លវជាតិលេខ៦ ត្រង់ចំណុចផ្លូវបំបែក ភូមិធន់មោង ឃុំកំពង់ថ្ម ស្រុកសន្ទុក ខេត្តកំពង់ធំ។

ម្ចាស់ម៉ូតូមានឈ្មោះ ងាន ធឿន ភេទប្រុស អាយុ៣៦ឆ្នាំ ស្នាក់នៅនៅភូមិ៧មករា ឃុំតាំងក្រសាំង ស្រុកសន្ទុក ខេត្តកំពង់ធំ បើកម៉ូតូមួយគ្រឿង ម៉ាក ហុងដា សេ១២៥ ពណ៌ខ្មៅ ពាក់ស្លាកលេខ សៀមរាប1F-1064។ ចំណែកម្ចាស់រថយន្តមិនត្រូវបានស្គាល់អត្តសញ្ញាណច្បាស់នោះទេ បើករថយន្តមួយគ្រឿងម៉ាក ហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3A-2124។

មុនពេលកើតហេតុ ភាគីទាំង២បានធើ្វដំណើរបញ្រ្ចាសទិសគ្នា លុះមកដល់ចំណុចកើតហេតុ ភាគីខាងម៉ូតូបានរ៉េចង្កូតមកបុករថយន្តហ៊ីយ៉ាន់ដាយ ពេញទំហឹង ដោយភាគីខាងម៉ូតូបើកមិនប្រកាន់ស្តាំ បណ្តាលឲ្យស្លាប់ខណៈបញ្ជូនទៅសង្រ្គោះបន្ទាន់ នៅមន្ទីរពេទ្យខេត្តកំពង់ធំ។ រីឯម្ចាស់រថយន្តបានគេចខ្លួនបាត់ភ្លាមៗតែម្តង។

ក្រោយកើតហេតុ សមត្ថកិច្ចបាននាំយកវត្ថុតាងមករក្សាទុក នៅអធិការដ្ឋាននគរបាលស្រុក ដើម្បីធើ្វការដោះស្រាយបន្តតាមផ្លូវច្បាប់។ ចំណែកសាកសពប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕