កំពង់ចាមៈ នៅថ្ងៃទី​២ ខែមករា ឆ្នាំ២០១៨ វេលាម៉ោង​១និង១៨នាទីរសៀល សមត្ថកិច្ចទទួលបានពាក្យ​បណ្តឹង ពីជនរងគ្រោះម្នាក់ឈ្មោះ ប៉ុល វ៉ាន់នី បានប្ដឹង​ពីជនមិនស្គាល់អត្តសញ្ញាណម្នាក់ ពីបទលួចទូរសព្ទដៃរបស់ខ្លួន ម៉ាកiphone6plus ពណ៌ផ្កាឈូក និងទូរសព្ទម៉ាកSAMSUNG ដែលបានប្រព្រឹត្តឡើងក្នុងផ្ទះជនរងគ្រោះ ស្ថិតក្នុងស្រុកវាលវង់ ក្រុងកំពង់ចាម ខេត្តកំពង់ចាម។

ក្រោយ​ទទួលបានពាក្យបណ្តឹង កម្លាំងជំនាញនៃអធិការដ្ឋាននគរបាលក្រុងកំពង់ចាម បានចុះទៅស្រាវជ្រាវ ដើម្បីកំណត់​មុខសញ្ញាជនសង្ស័យ ​លុះដល់ថ្ងៃទី៣ ខែមករា ឆ្នាំ២០១៨ វេលាម៉ោង៦និង២០នាទីព្រឹក ​​ទើប​ឃាត់ខ្លួនជនសង្ស័យឈ្មោះ ជន ពេជ្រ ភេទប្រុស អាយុ១៨ឆ្នាំ
​ខណៈនោះជនសង្ស័យក៏បានឆ្លើយសារភាព បា្រប់ទៅសមត្ថកិច្ចថា ខ្លួនពិតជាបានចូលទៅលួចទូរសព្ទដៃក្នុងផ្ទះជនរងគ្រោះប្រាកដមែន។

បច្ចប្បន្ន ជនសង្ស័យត្រូវនាំខ្លួន​មកអធិការដ្ឋាននគរបាលស្រុក រួចកសាងសុំណុំរឿងបញ្ជូន​ទៅតុលា ដើម្បីផ្តន្ទាទោសតាមផ្លូវច្បាប់។ ​ចំណែកវត្ថុតាងប្រគល់​ជូនទៅជនរងគ្រោះវិញ៕