ព្រះសីហនុៈ ករណីគ្រោះថ្នាក់ចរាចរណ៍មួយ រវាងរថយន្តបើកបុក ម៉ូតូ១គ្រឿង ដែលបត់ឆ្លងកាត់ផ្លូវ ក្នុងទិសដៅបញ្ច្រាសគ្នា បណ្ដាលឲ្យស្លាប់បុរសម្នាក់ កាលពីវេលាម៉ោង ៥ និង០៥នាទីល្ងាចថ្ងៃទី១៣ ខែមករា ឆ្នាំ២០១៨ លើផ្លូវជាតិលេខ៤ ចន្លោះគីឡូម៉ែត្រ ១៨៩-១៨០ ស្ថិតនៅក្នុងភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ ។
រថយន្តបង្កម៉ាក SSANGYONG ពណ៌ ស្លែ គ្មានផ្លាកលេខ បើកបរដោយឈ្មោះ ផាន់ ណាហ្វី ភេទ ប្រុស អាយុ១៩ឆ្នាំ មុខរបរអ្នកបើកបររថយន្ត មានទីលំនៅភូមិចុងខ្សាច់ ឃុំទួលទទឹង ស្រុកព្រៃនប់ ខេត្តព្រះសីហនុ មានទិសដៅពីភ្នំពេញ ឆ្ពោះមកខេត្តព្រះសីហនុ ដល់ចំណុចខាងលើ បានបុកម៉ូតូ១គ្រឿង ដែលបត់ឆ្លងកាត់ផ្លូវ ក្នុងទិសដៅបញ្ច្រាសគ្នា ម៉ាក HONDA C125 ពណ៌ខ្មៅ ពាក់ស្លាកលេខភ្នំពេញ1G-8833 អូសរទេះ បើកបរដោយឈ្មោះ ព្រំ ណាត ភេទ ប្រុស អាយុ ៤៥ឆ្នាំ មានទីលំនៅភូមិឃុំកើតហេតុ បណ្ដាលឲ្យស្លាប់ភ្លាមនៅនឹងកន្លែងកើតហេតុ។
បច្ចុប្បន្នអ្នកបើករថយន្ត ឈ្មោះ ផាន់ ណាហ្វី ត្រូវនគរបាលឃាត់ខ្លួន នាំមកកាន់អធិការដ្ឋាននគរបាលស្រុកព្រៃនប់ ដើម្បីធ្វើការដោះស្រាយតាមនីតិវិធីច្បាប់៕
មតិយោបល់