ក្រចេះ: សមត្ថកិច្ចបានឃាត់ខ្លួនជនសង្ស័យម្នាក់ ពាក់ព័ន្ធនឹងករណីប៉ុនប៉ងរំលោភសេពសន្ថវៈ ទៅលើស្រ្តីម្នាក់ ខណៈដែលស្រ្តីរងគ្រោះបានដេកនៅក្រោមផ្ទះ ក៏ត្រូវជនសង្ស័យចូលធ្វើសកម្មភាពតែមិនសម្រេច។
ហេតុការណ៍នេះបានកើតឡើង កាលពីថ្ងៃច័ន្ទ ១៤រោច ខែបុស្ស ឆ្នាំរកា នព្វស័កព.ស២៥៦១ ត្រូវនឹងថ្ងៃទី១៥ ខែមករា ឆ្នាំ២០១៨ វេលាម៉ោង១និង៣០នាទីរសៀល ស្ថិតក្នុងភូមិសំពុង ឃុំថ្មអណ្ដើក ស្រុកចិត្របុរី ខេត្តក្រចេះ។
ជនរងគ្រោះមានឈ្មោះ ស.ព អាយុ៣៧ឆ្នាំ ជនជាតិខ្មែរ មុខរបរកសិករ និងជនសង្ស័យមានឈ្មោះ ឈីន ម៉ុន ភេទប្រុស អាយុ៣៥ឆ្នាំ ជនជាតិខ្មែរ មុខរបរកសិករ ទាំង២នាក់ស្នាក់នៅភូមិឃុំកើតហេតុ។
មុនពេលកើតហេតុ ជនសង្ស័យបានលបចូលទៅក្នុងមុងរបស់ជនរងគ្រោះ ដើម្បីធ្វើសកម្មភាព ភ្លាមនោះជនរងគ្រោះក៏ស្រែកទ្បូទ្បា ទើបមានកាអន្តរាគមន៍ពីអ្នកជិតខាង និងប្តីស្រ្តីរងគ្រោះ ទើបក្របួចជនសង្ស័យបាន រួចប្រគល់ឲ្យសមត្ថកិច្ចប៉ុស្តិ៍រដ្ឋបាលថ្មអណ្តើក។
បច្ចុប្បន្ន ជនសង្ស័យត្រូវឃាត់ខ្លួនបណ្ដោះអាសន្ន នៅអធិការដ្ឋាននគរបាលស្រុកចិត្របុរី ដើម្បីចាត់ការទៅតាមនីតិវិធីច្បាប់៕
មតិយោបល់