សៀមរាបៈ លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានប្រាប់ Post Newsថា មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តហ៊ីយ៉ាន់ដាយ បើកបុកម៉ូតូឆ្លងផ្លូវ ក្នុងទិសដៅបញ្រ្ចាសគ្នា បណ្តាលឲ្យស្លាប់ម្នាក់និងរបួសម្នាក់។
ហេតុការណ៍នេះបានកើតឡើង កាលពីថ្ងៃពុធ ១កើត ខែមាឃ ឆ្នាំរកា នព្វស័កព.ស២៥៦១ ត្រូវនឹងថ្ងៃទី១៧ ខែមករា ឆ្នាំ ២០១៨ វេលាម៉ោង៨និង២០នាទីយប់ ស្ថិតលើផ្លូវជាតិលេខ៦ ភូមិយាង ឃុំឫស្សីលក ស្រុកជីក្រែង ខេត្តសៀមរាប។
ជនរងគ្រោះមានឈ្មោះ សយ មុំ ភេទប្រុស អាយុ១៦ឆ្នាំ(ស្លាប់) ស្នាក់នៅភូមិតាព្រុំ ឃុំសង្វើយ ស្រុកជីក្រែង ខេត្តសៀមរាប បើកម៉ូតូម៉ាកវីវ៉ា ពណ៌ខ្មៅ ពាក់ស្លាកលេខភ្នំពេញ 1AB-7934 និងអ្នករួមដំណើរឈ្មោះ ផន ផាត ភេទប្រុស អាយុ១៥ឆ្នាំ ស្នាក់នៅភូមិក្រប៉ៅ ឃុំសង្វើយ របួសធ្ងន់ត្រូវបញ្ជូនទៅកាន់មន្ទីរពេទ្យខេត្ត។ ចំណែកជនបង្កមានឈ្មោះ លី ប៊ិន ភេទប្រុស អាយុ៤៥ឆ្នាំ ស្នាក់នៅភូមិត្រពាំងថ្មាត ឃុំស្រម៉រ ស្រុកជើងព្រៃ ខេត្តកំពង់ចាម(ឃាត់ខ្លួន) បើករថយន្តម៉ាកហ៊ីយ៉ាន់ដាយផ្លូវ៥ ក្បាលស្លាកលេខកំពង់ចាម 3A-6768 សណ្តោងរម៉ក ស្លាកលេខភ្នំពេញ 4A-1945។
ក្រោយកើតហេតុ កម្លាំងជំនាញបានចុះមកធ្វើការវាស់វែងដល់កន្លែងកើតហេតុ និងនាំយកវត្ថុតាងមករក្សាទុក នៅអធិការដ្ឋាននគរបាលស្រុក ដើម្បីកសាងសំណុំរឿងដោះស្រាយតាមផ្លូវច្បាប់៕
មតិយោបល់