Post News Media ព័ត៌មានជាតិ ឃាតកម្មដ៏សាហា...

ឃាតកម្មដ៏សាហាវ! រំលោភសម្លាប់ក្មេងអាយុ១៣ឆ្នាំ ចាក់ទាំងអ្នកចូលមកជួយ ចាក់ទាំងគូដណ្តឹងចំសុដន់ និងចាក់សម្លាប់ខ្លួនឯងតាមក្រោយ តែមិនស្លាប់ត្រូវប៉ូលិសចាប់ខ្លួន

ពោធិ៍សាត់: មានករណីឃាតកម្ម ដ៏សាហាវឃោឃៅមួយបានកើតឡើង ដោយមានជនសង្ស័យម្នាក់ បានធ្វើសកម្មភាពរំលោភរួចចាក់សម្លាប់ក្មេងអាយុ១៣ឆ្នាំ យ៉ាងសាហាវ ត្រូវបានបុរសម្នាក់ដែលកំពុងដើររកក្របី បានឃើញសំឡេងស្រែកដង្ហោយឲ្យជួយ ក៏រត់ទៅជួយ បែរជាត្រូវជនសង្ស័យដេញចាក់បណ្តាលឲ្យរបួសធ្ងន់ម្នាក់ រួចជនសង្ស័យរូបនោះបានបន្តទៅធ្វើសកម្មភាពចាក់គូដណ្តឹង ចំសុដន់ បណ្តាលឲ្យរបួសធ្ងន់និងចាក់ខ្លួនឯងតាមក្រោយ បណ្តាលឲ្យរបួសដូចគ្នា តែត្រូវសមត្ថកិច្ចឡោមព័ទ្ធចាប់ខ្លួនបានតែម្តង។

ហេតុការណ៍នេះកើតឡើងកាលពីវេលាម៉ោង១១និង៣០នាទី ព្រឹកថ្ងៃទី១៨ ខែមករា ឆ្នាំ២០១៨ ស្ថិតនៅចំណុចបឹងត្រាំតាហា ភូមិក្សេត្របូរី ឃុំសន្ទ្រែ ស្រុកភ្នំក្រវ៉ាញ ខេត្តពោធិ៍សាត់។

ជនសង្ស័យឈ្មោះ ង៉ុយ អ៉ី ភេទប្រុស អាយុ២២ឆ្នាំ រស់នៅភូមិកើតហេតុខាងលើ។ ចំណែកក្មេងស្រីរងគ្រោះ ឈ្មោះ យឿង យាំ អាយុ១៣ឆ្នាំ ស្នាក់នៅភូមិជាមួយគ្នា។ រីឯគូដណ្តឹងរបស់ជនសង្ស័យឈ្មោះ ឌីន ដេ អាយុ១៨ឆ្នាំ ។ចំណែកអ្នកចូលមកជួយមាន៣នាក់ ឈ្មោះ យឺ ប៉េស អាយុ២៣ឆ្នាំ ឈ្មោះ បូន ភីន និងឈ្មោះ ឌឿន ជា ហើយក្នុងចំណោម៣នាក់ មានម្នាក់ឈ្មោះ យឺ ប៉េស ត្រូវជនសង្ស័យចាក់ចំពោះ របួសធ្ងន់។

តាមការបញ្ជាក់ គឺករណីនេះកើតឡើង ខណ:ដែលក្មេងស្រីរងគ្រោះចេញពីសាលាដើរតាមផ្លូវរទេះ ដល់ចំណុចកើតហេតុជាកន្លែងស្ងាត់ ជនសង្ស័យបានចេញមកចាប់ជនរងគ្រោះវាយបង្ខំលើរាងកាយ ប៉ុនប៉ងរំលោភសេពសន្ថវ: ក្នុងពេលនោះជនរងគ្រោះស្រែកឲ្យគេជួយ ចៃដន្យមានមនុស្សប្រុស៣នាក់ កំពុងដើររកក្របី បានឭក៏ចូលទៅជួយ តែត្រូវជនសង្ស័យចាក់១កាំបិត ចំពោះ បណ្តាលឲ្យរបួសធ្ងន់ ត្រូវមិត្តភក្តិចូលទៅគ្រារត់ចេញ ហើយត្រូវបានជនសង្ស័យជនសង្ស័យដេញតាមតែមិនទាន់ ទើបជនសង្ស័យបែរគោលដៅមកដេញចាក់សម្លាប់ ក្មេងស្រីរងគ្រោះចំលើដើមដោះខាងឆ្វេង បណ្តាលឲ្យប្រកាច់ដាច់ខ្យល់ស្លាប់តែម្តង រួចរត់គេចខ្លួនបាត់។

ក្រោយមកនៅម៉ោង៧និង៥នាទីយប់ថ្ងៃដដែល ជនសង្ស័យបានទៅចាក់គូដណ្តឹងរបស់ខ្លួន ចំដើមដោះខាងឆ្វេង បណ្តាលឲ្យរបួសធ្ងន់ បន្ទាប់មកជនសង្ស័យក៏យកកាំបិតចាក់ខ្លួនឯងចំត្រង់ពោះ បណ្តាលឲ្យរបួសធ្ងន់ រួចគ្រាគូដណ្តឹងសំដៅមកផ្ទះរបស់ខ្លួន តែក៏ត្រូវសមត្ថកិច្ចឡោមពទ្ធ័ចាប់បានតែម្តង។

ជនរងគ្រោះជាគូដណ្តឹងត្រូវបានបញ្ជូនទៅមន្ទីរពេទ្យស្រុកភ្នំក្រវ៉ាញ។ ចំណែកជនរងគ្រោះឈ្មោះ យឺ ប៉េស ត្រូវបានបញ្ជូនមកមន្ទីរពេទ្យនៅភ្នំពេញ ។ រីឯជនសង្ស័យត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យខេត្តពោធិ៍សាត់។ ដោយឡែកសពក្មេងស្រីអាយុ១៣ឆ្នាំ ត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី៕