ភ្នំពេញ៖ កម្ពុជា​សម្រេចបានគោលដៅប្រយុទ្ធប្រឆាំងជំងឺរបេង និងបានក្លាយជាប្រទេសគំរូសម្រាប់ប្រទេសនានា នៅលើពិភពលោក។ នេះបើយោងតាម​ប្រសាសន៍របស់សម្ដេចតេជោ នាយករដ្ឋមន្ត្រីនៃព្រះរាជាណាចកម្ពុជា។

យោងតាមការចុះផ្សាយរបស់ AKP ដែលបានចេញផ្សាយនៅថ្ងៃទី២៤ ខែមីនានេះ ដោយបានស្រង់យកខ្លឹមសារ​នៅក្នុងសាលិខិតរបស់នាយករដ្ឋមន្ត្រី​កម្ពុជា​ដែលបាន​ចុះហត្ថលេខា​កាលពីថ្ងៃទី២៣ ខែមីនា ក្នុងការអបអរសាទរទិវាប្រយុទ្ធជំងឺរបេងពិភពលោក ថ្ងៃទី២៤ ខែមីនា ឆ្នាំ២០១៥ ថា អត្រាឈឺ និងស្លាប់​ដោយសារជំងឺរបេងនៅប្រទេសកម្ពុជាយើងមានការធ្លាក់ចុះយ៉ាងខ្លាំង ក្នុងនោះអត្រាស្លាប់បានធ្លាក់ចុះពី១៥៧ ក្នុងចំណោមប្រជាជន ១០ម៉ឺននាក់ កាលពី​ឆ្នាំ១៩៩០ មកនៅត្រឹម ៦៦ករណី ក្នុងចំណោមប្រជាជន ១០ម៉ឺននាក់នៅឆ្នាំ២០១៣ ដែលមានអត្រាធ្លាក់ចុះស្មើនឹង៥៨ភាគរយ។ តួលេខនេះបញ្ជាក់ថា ប្រទេសកម្ពុជាបានសម្រេចគោលដៅអភិវឌ្ឍន៍សហស្សវត្សរួចហើយ ដែលកំណត់ត្រឹម៥០ភាគរយនៅឆ្នាំ២០១៥។

យោងតាមសាលិខិតក៏បានបញ្ជាក់ផងដែរថា នៅក្នុងពិភពលោកទាំងមូលក្នុងមួយឆ្នាំៗមានប្រជាជនប្រមាណ៩លាននាក់កើតជំងឺរបេង ប៉ុន្តែអ្នកជំងឺ​ប្រមាណ ៣,៣លាននាក់ក្នុងមួយឆ្នាំៗពុំបានទទួលសេវាថែទាំ និងព្យាបាលនៅឡើយ ហើយលើសពីនេះ ជំងឺរបេងបានឆក់យកជីវិតមនុស្សក្នុ​មួយឆ្នាំៗប្រមាណ ១,៥លាននាក់៕