ព័ត៌មានជាតិ

ឮប្តី​ស្រែកឲ្យជួយផង មកដល់​ស្លាប់បាត់!..

កណ្តាល: បុរសម្នាក់យកម៉ូទ័រដើម្បីបូមទឹកដាក់អាងនិងពាងប្រើប្រាស់ ក៏ត្រូវចរន្តអគ្គិសនីនៃម៉ូតូបូមទឹក ឆក់ស្លាប់យ៉ាងអាណោចអាធ័ម។

ហេតុការណ៍នេះបានកើតឡើង​ នៅថ្ងៃច័ន្ទ​ ៦កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹង ថ្ងៃទី២២​ ខែមករា ឆ្នាំ២០១៨ ​ស្ថិតត្រង់​​ភូមិពុកឬស្សីក្រោម ឃុំពុកឬស្សី ស្រុកខ្សាច់កណ្តាល ខេត្ត‌កណ្ដាល‌។​

ជនរងគ្រោះ‌មានឈ្មោះ‌ ​អ៊ូ ង៉ើត ភេទ‌​ប្រុស អាយុ​៥៨ឆ្នាំ​ ជនជាតិ​ខ្មែរ​ មុខរបរ​កសិករ មានមានទីលំនៅភូមិពុកឬស្សីក្រោម ឃុំពុកឬស្សី ស្រុក​ខ្សាច់កណ្តាល ខេត្តកណ្តាល មានប្រពន្ធឈ្មោះ ហេង ថោ អាយុ៦០ឆ្នាំ ជនជាតិខ្មែរ មុខរបរ កសិករ មានទីលំនៅភូមិឃុំជាមួយគ្នា។

​មុនពេលកើតហេតុ ជនរងគ្រោះ​ បាន​យកម៉ូទ័របូមទឹកដាក់អាង និងពាងដើម្បីប្រើប្រាស់ ហើយបានប្រាប់ថា​ យកម៉ូទ័រដើម្បីបូមទឹកដាក់អាងនិងពាង នៅឯក្រោយផ្ទះដូចថ្ងៃធម្មតាដែរ។ ចំណែក​ប្រពន្ធនៅបោសសំអាតផ្ទះ បានបន្តិចក្រោយមកស្រាប់តែឮ សំឡេងជនរងគ្រោះស្រែកឲ្យគេជួយ ឮដូច្នេះ​ប្រពន្ធបានរត់ទៅក្រោយផ្ទះមើល ពេលទៅដល់ឃើញជនរងគ្រោះ ដេកលើដីក្បែរម៉ូទ័រ ហើយដៃស្តាំកាន់ព្រីខ្សែភ្លើងជាប់ ឃើញដូចនេះឈ្មោះ ហេង ថោ បានយកឈើឬស្សីមកផ្ទាត់ខ្សែភ្លើងចេញ ហើយប្រពន្ធជនរងគ្រោះបានស្រែកឆោឡោ ឲ្យអ្នកជិតខាងជួយ តែជនរងគ្រោះបានស្លាប់បាត់​ជីវិតទៅហើយ។

បន្ទាប់ពីទទួលបានដំណឹង សមត្ថកិច្ចនគរបាលប៉ុស្តិ៍ពុកឬស្សី ​សហការជាមួយក្រុមប្រឹក្សាឃុំ មេភូមិ គ្រូពេទ្យ ពិនិត្យឃើញថា​ ជនរងគ្រោះមានស្នាមដាច់រលាត់ស្បែក ម្រាមដៃខាងស្តាំ មួយកន្លែងក្រៅពីនេះ ពុំមានស្លាកស្នាមអ្វីឡើយ រួចសន្និដ្ឋានថាជនរងគ្រោះ ពិតជាស្លាប់ដោយឆក់ខ្សែភ្លើងពិតប្រាកដមែន។ ចំណែកសព ប្រគល់ជូនក្រុមគ្រួសារ ធ្វើបុណ្យតាមប្រពៃណី៕

មតិយោបល់