ភ្នំពេញ: បុរសម្នាក់ត្រូវបានគេដឹកមកទម្លាក់ចោល ជិតផ្ទះជួលបងប្អូនពេលជិតភ្លឺឃើញដេកស្លាប់ នៅលើដីសង្ស័យខ្យល់គ
ហេតុការណ៍ភ្ញាក់ផ្អើលនេះ កើតទ្បើងកាលពីវេលាម៉ោង ៤ និង៥៥នាទីទៀបភ្លឺថ្ងៃទី២ ខែកុម្ភ: ឆ្នាំ២០១៨ ស្ថិតនៅភូមិត្រពាំងក្រសាំង ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
បុរសដែលដេកស្លាប់ខាងលើមានឈ្មោះ ថៅ សុខជា អាយុ២៤ឆ្នាំ មុខរបរកម្មករសំណង់ ស្នាក់នៅម្តុំព្រែកព្នៅ ខណ្ឌព្រែកព្នៅ មានស្រុកកំណើតនៅភូមិត្នោត ឃុំរោងដំរី ស្រុកបាភ្នំ ខេត្តព្រៃវែង ។ ជនរងគ្រោះមានបងប្អូនចំនួន៤នាក់ សុទ្ធតែប្រុស ដោយជនរងគ្រោះជាកូនពៅ ។
តាមប្រភពព័ត៌មានពីសាច់ញាតិ មានឈ្មោះ ជា ណាំ ភេទស្រី អាយុ៥៣ឆ្នាំ មុខរបរកម្មកររោងចក្រ ស្នាក់នៅភូមិកើតហេតុខាងលើ ស្រុកកំណើតនៅភូមិត្នោត ឃុំរោងដំរី ស្រុកបាភ្នំ ខេត្តព្រៃវែង ដែលស្នាក់នៅកន្លែងកើតហេតុ បានឲ្យដឹងថា កន្លងមកជនរងគ្រោះ ធ្លាប់មកស្នាក់នៅផ្ទះជួលកន្លែងកើតហេតុ ប៉ុន្តែបច្ចុប្បន្នឈប់ស្នាក់នៅហើយ ដោយបានទៅធ្វើការនៅម្តុំព្រែកព្នៅ ៥ទៅ៦ថ្ងៃមកនេះ លុះនៅវេលាម៉ោង៦ល្ងាច ថ្ងៃទី១ ខែកុម្ភ: ឆ្នាំ២០១៨ មានអ្នករត់ម៉ូតូឌុបម្នាក់ បានដឹកជនរងគ្រោះមកដាក់ក្បែរផ្ទះកើតហេតុខាងលើ ហើយគេឃើញជនរងគ្រោះមានអាការរវើរវាយដើរមកក្នុងបរិវេណដីឡូត៍កើតហេតុ ដែលជាផ្ទះអ្នកស្គាល់គ្នា និងកន្លែងដែលធ្លាប់ស្នាក់នៅក្នុងស្ថានភាពស្រវឹងខ្លះផង ឃើញដូច្នេះសាច់ញាតិ ក៏បានក្រាលកន្ទេលឲ្យដេកនៅលើគ្រែក្រោមផ្ទះរហូតដល់ម៉ោង៤ និង៥៥ នាទីទៀបភ្លឺ គាត់ភ្ញាក់ពីដំណេកចុះមករៀបចំដាំបាយទៅធ្វើការរោងចក្រ ស្រាប់តែឃើញជនរងគ្រោះធ្លាក់ពីលើគ្រែដេកផ្កាប់មុខនៅលើដីស្លាប់បាត់ទៅហើយ ។
ក្រោយកើតហេតុ បងប្អូន និងសាច់ញាតិសពជនរងគ្រោះ បានរាយការណ៍ទៅសមត្ថកិច្ចជំនាញ ចុះមកពិនិត្យសពរួចប្រគល់ឲ្យបងប្អូនយកទៅធ្វើបុណ្យតាមប្រពៃណីនៅស្រុកកំណើត ៕
មតិយោបល់