សៀមរាបៈ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តរបាំងកន្លះ បានបុកជាមួយរថយន្តម៉ាក ស៊ីណាដឹកទំនិញគេចពន្ធ បណ្តាលឲ្យក្រឡាប់ផ្ងារពោះឡើងលើ ។
ហេតុការណ៍នេះកើតឡើងនៅ២និង២០នាទី ឈានចូលថ្ងៃទី៩ ខែកុម្ភៈ ឆ្នាំ២០១៨ លើផ្លូវជាតិលេខ៦ សង្កាត់ស្វាយដង្គំ ក្រុងសៀមរាប ខេត្តសៀមរាប ។
មុនពេលកើតហេតុ គេឃើញរថយន្ត១បាំងកន្លះ ពណ៌ក្រហម ពាក់ស្លាកលេខ ភ្នំពេញ 2K-9145 បើកបរដោយអ្នកស្រវឹង ពីត្បូងទៅជើង ក្នុងល្បឿនលឿនបានបុកចំពាក់កណ្តាលទ្វាររថយន្តស៊ីណា ស្លាកលេខ ភ្នំពេញ 2AJ-3407 ដឹកទំនិញគេចពន្ធ ដែលបើកពីលិចមកកើត បណ្តាលឲ្យបែកកង់ក្រោយទាំងសងខាងក្រឡាប់ផ្ងារពោះឡើងលើតែម្តង សំណាងមិនមានអ្នកណាម្នាក់រងរបួស។
ក្រោយកើតហេតុ សមត្ថកិច្ចបានចុះមកធ្វើការវាស់វែង នាំយករថយន្តទាំង២គ្រឿង ទៅរក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត រង់ចាំដោះស្រាយគ្នាតាមច្បាប់បន្តទៀត៕
មតិយោបល់