ភ្នំពេញ: បុរស ពីរនាក់ ត្រូវបានក្រុមចោរមានគ្នា ៣ប្រដាប់ដោយអាវុធខ្លីមួយដើមធ្វើសកម្មភាពភ្ជង់ប្លន់យកម៉ូតូ មួយគ្រឿង កាលពីវេលាម៉ោង៨និង៤០នាទីយប់ ថ្ងៃទី១៤ ខែមិថុនា ឆ្នាំ២០១៦ នៅចំណុចខាងកើតគល់ស្ពានលី យ៉ុងផាត់ ប្រហែលជា ១០០ម៉ែត្រ ស្ថិតក្នុងសង្កាត់បាក់ខែង ខណ្ឌជ្រោយចង្វា។
ប្រភពឲ្យដឹងថា ជនរងគ្រោះឈ្មោះ ជួន វណ្ណ: ភេទប្រុស អាយុ ៣៦ឆ្នាំ មុខរបរជាងដែក ស្នាក់នៅក្នុងការដ្ឋានក្បែស្ថានីយ៍ទូរទស្សន៍ PNN និងម្នាក់ទៀតឈ្មោះ ប៉ាវ ចិន្ដា ភេទប្រុស អាយុ ២១ឆ្នាំ ស្នាក់នៅភូមិព្រែកតាសេត សង្កាត់ព្រែកតារ័ត្ន ខណ្ឌជ្រោយចង្វា និងមានស្រុកកំណើតជាមួយគ្នានៅភូមិកំពង់ភ្នំ ឃុំអំពិលទឹក ស្រុកលើកដែក ខេត្តកណ្តាល។
ប្រភពព័ត៌មានពីជនរងគ្រោះបានឲ្យដឹង មុនពេលកើតហេតុរូបគាត់ ហើយនិងឈ្មោះ ប៉ាវ ចិន្ដា បាននាំគ្នាជិះម៉ូតូ មួយគ្រឿង ម៉ាក HONDA C125 ពណ៌ខ្មៅ ពាក់ស្លាកលេខ ភ្នំពេញ 1BS-4461 ដោយបានជិះចេញពីការដ្ឋានបំណងទៅរកទិញអីហូបនៅម្តុំគល់ស្ពាន លី យ៉ុងផាត់ត្រើយខាងលិច។
នៅពេលដែលជិះដល់គល់ស្ពានត្រើយខាងកើតបានប្រហែលជា ១០០ម៉ែត្រ ស្រាប់តែមានជនសង្ស័យមានគ្នា ៣នាក់ បានជិះម៉ូតូ ២គ្រឿង ម៉ាក SL មួយគ្រឿង និងម៉ាក MSX មួយគ្រឿង ព្រមទាំងប្រដាប់ដោយកាំភ្លើងខ្លី មួយដើម មិនស្គាល់ម៉ាកបានជិះមកជិត ហើយដកកាំភ្លើងភ្ជង់ និងវាយមកលើរូបគាត់ ២ស្នាប់កាំភ្លើងថែមទៀត បណ្ដាលឲ្យរូបគាត់បែកក្បាលហូរឈាម។
គួរបញ្ជាក់ផងដែរថា នៅក្នុងទឹកដីខណ្ឌជ្រោយចង្វានេះ គឺតែងតែមានករណីប្លន់ប្រដាប់អាវុធជាញឹកញាប់ ហើយករណីនេះ បានបណ្ដាលឲ្យជនរងគ្រោះរងរបួសថែមទៀត ចំណែកឯជនសង្ស័យគឺជាមុខសញ្ញាចាស់ដដែលៗ តែកម្លាំងសមត្ថកិច្ចក៏ដូចជាកម្លាំងកងរាជអាវុធហត្ថនៅមិនទាន់បង្ក្រាបបាននៅឡើយទេ។
ក្រោយពីកើតហេតុ កម្លាំងសមត្ថកិច្ច និងកម្លាំងកងរាជអាវុធហត្ថខណ្ឌ បានចុះទៅសួរនាំជនរងគ្រោះ ក្រោយមកជនរងគ្រោះបានដាក់ពាក្យប្តឹង ដើម្បីឲ្យកម្លាំងសមត្ថកិច្ច និងកម្លាំងកងរាជអាវុធហត្ថ ដើម្បីកំណត់មុខសញ្ញា៕
មតិយោបល់