ភ្នំពេញ: ស្រ្តីម្នាក់ ជិះម៉ូតូជូនមិត្តភក្តិទៅផ្ទះ រួចជិះត្រឡប់មកផ្ទះវិញ ត្រូវបានជនសង្ស័យ២នាក់ជិះ១គ្រឿងមកពីក្រោយធ្វើសកម្មភាពឆក់កាបូបស្ពាយមិនបានសម្រេច ដួលបោកនឹងថ្នល់រងរបួសបែកមុខបែកមាត់ធ្ងន់។

ហេតុការណ៍នេះកើតឡើងកាលពីវេលាម៉ោង៨និង៥០នាទីយប់ថ្ងៃទី១២ ខែកុម្ភ: ឆ្នាំ២០១៨ ស្ថិតនៅតាមបណ្តោយផ្លូវលេខ១៨២ ខាងកើតប៉ុស្តិ៍នគរបាលសង្កាត់ទឹកល្អក់៣ ប្រមាណជាង២០ម៉ែត្រ ក្នុងសង្កាត់ទឹកល្អក់២ ខណ្ឌទួលគោក រាជធានីភ្នំពេញ។

ជនរងគ្រោះមានឈ្មោះ នួន​ កញ្ជនី ភេទស្រី អាយុ២២ឆ្នាំ មុខរបរនិសិត្ស ស្នាក់ផ្ទះជួលមួយកន្លែងក្បែរផ្សារជិនណាន ក្នុងសង្កាត់ទឹកថ្លា ខណ្ឌសែនសុខ។

តាមប្រភពព័ត៌មានពីនារីម្នាក់ដែលត្រូវជាមិត្តភក្តិជនរងគ្រោះបានប្រាប់ឲ្យដឹងថា មុនកើតហេតុរូបគាត់និងជនរងគ្រោះជិះម៉ូតូ១គ្រឿងមកស្តារការងារក្នុងមន្ទីរពេទ្យរុស្ស៊ី ដល់ពេលចប់ម៉ោងការងារ ជនរងគ្រោះបានជិះម៉ូតូឌុបរូបគាត់ជូនមកផ្ទះនៅម្តុំសាលារៀនវ៉ាន់ដារ ក្នុងសង្កាត់ទំនប់ទឹក ខណ្ឌចម្ការមន។ ក្រោយពីជូនរូបគាត់មកដល់ផ្ទះរួចជនរងគ្រោះបានបន្តដំណើរតែម្នាក់មកផ្ទះវិញ ដោយជិះម៉ូតូម៉ាកហុងដា ពណ៌សំបកឪឡឹក ពាក់ស្លាកលេខ ស្វាយរៀង 1B-7628 ជិះទិសដៅពីកើតទៅលិច លុះមកដល់ចំណុចកើតហេតុខាងលើ ក៏លេចមុខជនសង្ស័យពីនាក់ជិះម៉ូតូមួយគ្រឿងមិនចាំម៉ាកមកពីក្រោយស្របទិសដៅគ្នា បានធ្វើសក្មមភាពឆក់កាបូបដែលរូបគាត់ស្ពាយចំហៀងនៅខាងមុខមិនបានសម្រេច បណ្តាលឲ្យដួលបោកនឹងថ្នល់បណ្តាលឲ្យរងរបួស បែកមុខបែកមាត់ធ្ងន់។ ចំណែកជនសង្ស័យឃើញសភាពមិនស្រួលបានជិះម៉ូតូគេចខ្លួនបាត់ស្រមោល។

ក្រោយកើតហេតុ សមត្ថកិច្ចមូលដ្ឋានបានចុះមកដល់រួមនឹងដាច់ញាតិជនរងគ្រោះផងដែរ។ ក្រោយមកជនរងគ្រោះត្រូវបានសាច់ញាតិបញ្ជូនតាមរ៉ឺម៉កម៉ូតូកង់បីឥណ្ឌា ទៅសង្គ្រោះដោយខ្លួនឯង។ ចំណែកម៉ូតូសមត្ថកិច្ចប្រគល់ជូនសាច់ញាតិយកត្រឡប់ទៅផ្ទះវិញហើយជនរងគ្រោះមិនបានដាក់ពាក្យបណ្តឹងនោះទេ៕

//youtu.be/ipemp8SSiDs