Post News Media ព័ត៌មានជាតិ អីយ៉ាស់! ស្រវ...

អីយ៉ាស់! ស្រវឹងជោកជិះបញ្ច្រាសផ្លូវត្រូវប៉ូលិសចាប់ វាយប៉ូលិស!

ភ្នំពេញ: បុរសមាឌធំ២នាក់ មកពីផឹកស្រាវិញស្រវឹងទោទន់ ជិះម៉ូតូឌុបគ្នាបញ្រ្ចាសផ្លូវ នៅរង្វង់មូលវិមានឯករាជ្យ ត្រូវកម្លាំងចម្រុះឃាត់ តែបែរជាក្អេងក្អាងអុកឡុកប្រតាយប្រតប់វាយគ្នាជាមួយសមត្ថកិច្ចរបួសជើងម្នាក់​ រហូតត្រូវសមត្ថកិច្ចវាយខ្នោះបញ្ជូនទៅអធិការដ្ឋានខណ្ឌទាំងយប់។

ហេតុការណ៍នេះបានកើតឡើងនៅវេលាម៉ោង១០និង២០នាទីយប់ ថ្ងែទី១៣ ខែកុម្ភ: ឆ្នាំ២០១៨ ស្ថិតនៅក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ។

ជនសង្ស័យ​ទាំង២នាក់ ១ឈ្មោះ ពិសី អាយុ២៩ឆ្នាំ មុខរបរ​រកស៊ី​ និងទី២ឈ្មោះ ហេង អាយុ៣០ឆ្នាំ ។

ប្រភពពីមន្ត្រីនគរបាលនៅកន្លែងកើតហេតុបានឲ្យដឹងថាដឹងថា នៅមុនកើតហេតុគេឃើញបុរសមាឌធំ ២នាក់ជិះម៉ូតូ មិនចាំម៉ាកមួយគ្រឿង ឌុបគ្នា ក្នុងទិសដៅពីកើតទៅលិច តាមបណ្ដោយមហាវិថីសុរាម្រិត បត់ឆ្វេងបញ្រ្ចាសផ្លូវ នៅចំណុចរង្វង់មូលវិមានឯករាជ្យ តែត្រូវសមត្ថកិច្ចចម្រុះកំពុងដាក់គោលដៅ អនុវត្តច្បាប់ចរាចរណ៍ធ្វើការឃាត់យកម៉ូតូមកអប់រំណែនាំ ស្រាប់តែបុរសមាឌធំទាំង២នាក់នោះ ក្អេងក្អាងអុកឡុកបបួលសមត្ថកិច្ចវាយគ្នា ភ្លាមនោះនគរបាលអន្តរាគមន៍៤នាក់បានចូលទៅឃាត់ តែបែរជាមិនព្រមស្ដាប់ហើយប្រតាយប្រតប់តដៃជាមួយសមត្ថកិច្ចនគរបាល បណ្ដាលឲ្យមន្ត្រីនគរបាលម្នាក់គ្រេច​ជើង ទើបត្រូវសមត្ថកិច្ចវាយខ្នោះឃាត់ខ្លួនបុរសមាឌធំទាំង២នាក់នោះ នាំឡើងរថយន្ត ។

ភ្លាមៗនោះបន្ទាប់ពីចុះបញ្ជាផ្ទាល់នៅកន្លែងអគ្គិភ័យមិនទាន់ចប់ស្រួលបួលផង លោក សុខ​ ពេញវុធ អភិបាលខណ្ឌដូនពេញ បានចុះមកភ្លាមៗ រួចបញ្ជាឲ្យកម្លាំងនាំខ្លួនបុរសមាឌធំទាំង២នាក់នោះបញ្ជូនទៅអធិការដ្ឋាននគរបាលខណ្ឌដូនពេញទាំងយប់តែម្ដង។ បន្ទាប់មកលោក សុខ​ ពេញវុធ​ អភិបាលខណ្ឌដូនពេញ​ បានឧបត្ថម្ភថវិកាផ្ទាល់ខ្លួនដើម្បីជាការលើកទឹកចិត្តជូនសមត្ថកិច្ចទាំង៤រូបផងដែរ៕