ភ្នំពេញ: កន្លងមកធ្លាយព័ត៌មានថា ព្រាប សុវត្ថិ ចូលរួមថតរឿងហូលីវ៉ូដឲ្យ តារាភាពយន្ត ជូលី ប៉ុន្តែព័ត៌មាននេះ ត្រូវបានសាបរលាបទៅវិញ ហើយថ្មីៗនេះដែរ ក៏ធ្លាយព័ត៌មានប្រាកដមួយទៀតថា ព្រាប សុវត្ថិ នឹងចូលរួមថតក្នុងភាពយន្ត JailBreak ដែលបានធ្វើសន្និសីទកាសែតកាលពីរាត្រីថ្ងៃទី១៧ ខែមិថុនា ឆ្នាំ២០១៦ ម្សិលមិញ។
ប្រភពព័ត៌មានពីសិល្បករដែលចូលរួមថតក្នុងភាពយន្ត JailBreak នេះបានខ្សឹបប្រាប់ Post News កាលពីរាត្រីថ្ងៃទី១៧ ខែមិថុនា ឲ្យដឹងថា ក្នុងភាពយន្តនេះ ក៏មានវត្តមានកំពូលតារាចម្រៀងព្រាប សុវត្ថិ ចូលរួមថតផងដែរ។
ប្រភពប្រាកដ និងច្បាស់ការណ៍ខាងលើ បានបន្តថា បើទោះបីជាពេលសន្និសីទកាសែត កំពូលតារាចម្រៀងខាងលើ មិនបង្ហាញមុខ ព្រោះតែគេចង់ធ្វើឲ្យសាច់រឿងនេះកក្រើក ប៉ុន្តែ ព្រាប សុវត្ថិ ដើរតួអ្វីឲ្យច្បាស់នោះ ប្រភពធ្លាយចេញពីមាត់សិល្បករនេះ មិនអាចបញ្ជាក់បានឡើយ។
ប្រភពដដែលថា ក្រៅពីតារាចម្រៀងព្រាប សុវត្ថិ នៅមាន តារាប្រុសស្រីៗល្បីៗក្នុងប្រទេសកម្ពុជាចូលរួមថត ប៉ុន្តែផលិតកម្ម កងចក្រភាពយន្ត និងផលិតករជនជាតិបរទេស បានលាក់ធ្វើជារឿងអាថ៌កំបាំងមួយរយ: មុននឹង សាច់រឿងចេញជាផ្លូវការនៅពេលខាងមុខ។
បើតាមប្រភពដដែល ក៏បានបញ្ជាក់ថា ភាពយន្តចាស់ ក្រោមចំណងជើងថា ហនុមាន បានចាយទុន ១០ ម៉ឺនដុល្លារ ហើយរឿង JailBreak នេះអាចនឹងចាយទុនគុណនឹង៦ដង លើរឿងចាស់៕
មតិយោបល់