ភ្នំពេញៈ ជនសង្ស័យម្នាក់ ត្រូវបានកម្លាំងនគរបាលប៉ុស្តិ៍ជ័យជំនះ ធ្វើការឃាត់ខ្លួនបានភ្លាមៗ ក្រោយពីធ្វើសកម្មភាពឆក់ កាមេរ៉ាមួយគ្រឿង ពីបុរសជនជាតិអង់គ្លេសម្នាក់ កាលពីវេលាម៉ោង១២និង៣០នាទី ថ្ងៃត្រង់ទី២១ ខែមីនាឆ្នាំ២០១៨ នៅចំណុចផ្លូវលេខ១៩ សង្កាត់ជ័យជំនះ ខណ្ឌដូនពេញ រាជធានីភ្នំពេញ។

ប្រភព័ត៌មាននៅកន្លែងកើតបានឲ្យដឹងថា មុនពេលកើតហេតុ គេឃើញបុរសជនជាតិអង់គ្លេសខាងលើ បានដើរទេសចរនៅម្តុំខាងក្រោយវត្តឧណ្ណាលោម ស្របពេលនោះក៏មានជនសង្ស័យ២នាក់ ជិះម៉ូតូមួយគ្រឿងបានធ្វើសកម្មភាពឆក់យកកាមេរ៉ាពីជនបរទេសខាងលើ តែសំណាងអាក្រក់ ត្រូវជនបរទេសបានទាញខ្សែកាមេរ៉ា ពីជនសង្ស័យបានបណ្តាលឲ្យជនសង្ស័យម្នាក់ ធ្លាក់ពីលើម៉ូតូត្រូវសមត្ថកិច្ចនៅក្បែរនោះ ចាប់វាយខ្នោះបានភ្លាមៗ។ ចំណែកបក្ខពួកម្នាក់ទៀតដែលជាអ្នកបើកម៉ូតូបានជិះរត់គេចខ្លួនបាត់ដោយសុវត្ថភាព។ ចំណែកជនរងគ្រោះត្រូវបានសមត្ថកិច្ចនាំមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលប៉ុស្តិ៍ជ័យជំនះ។

សមត្ថកិច្ចបានឲ្យដឹងថាជនសង្ស័យខាងលើមានឈ្មោះរិន មករា អាយុ១៧ឆ្នាំ មុខរបរមិនពិតប្រាកដ ស្នាក់នៅម្តុំរង្វង់មូលផ្សារដើមថ្កូវ ខណ្ឌចំការមន។

បច្ចុប្បន្នជនសង្ស័យខាងលើត្រូវបានបញ្ជូនទៅឃុំខ្លួនបណ្តោះអាសន្ននៅអធិការខណ្ឌដូនពេញដើម្បីកសាងសុំនុំរឿងបញ្ជូនទៅតុលាការចាត់ការតាមនិតិវិធីច្បាប់បន្តទៀត៕