Post News Media ព័ត៌មានជាតិ ឡិចស៊ីស RX400...

ឡិចស៊ីស RX400 ស្លាក​លេខ​ ភ្នំពេញ​2AA-4333 មួយគ្រឿង បើកបរដោយបុរសម្នាក់ស្រវឹង មក​បុករបាំងថ្ម​ពុះ​ចែក​ទ្រូង​ផ្លូវ​ពេញទំហឹង!

ភ្នំពេញ: បុរស​ម្នាក់​ស្រវឹងធ្លាក់ភ្នែក ​បើក​បរ​រថយន្ត​ឡិចស៊ីស​មួយ​គ្រឿង​ បោះពួយ​យ៉ាង​លឿន ​រេចង្កូត​ទៅ​បុក​របាំង​ថ្ម​ពុះ​ចែក​ទ្រូង​ផ្លូវ​ បណ្ដាល​ឲ្យ​រថយន្ត​ដាច់​ក្រឡេកង់​ទៅ​មុខ​លែង​រួច​។

ហេតុការណ៍​នេះ​កើតឡើង​កាល​ពី​វេលាម៉ោង​១២និង៤០នាទី​រំលង​អធ្រាត្រ​ឈាន​ចូល​ថ្ងៃ​ទី​១៦​ ខែ​មិថុនា​ ឆ្នាំ​២០១៨ ត្រង់​ចំណុច​ខាងលិច​ស្តុប​ដីឥន្ធ​ ប្រមាណ​២០ម៉ែត្រ​ តាម​បណ្ដោយ​ផ្លូវ​កម្ពុជា​ក្រោម​ ស្ថិត​ក្នុង​សង្កាត់​ផ្សារ​ដេប៉ូ​ទី​៣​ ខណ្ឌ​ទួលគោក​។

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ ​គេឃើញ​បុរស​ម្នាក់​ស្រវឹងជោកជាំ​ បើកបរ​រថយន្ត​មួយ​គ្រឿង​ម៉ាក​ ឡិចស៊ីស​ RX400 ពណ៌​ខ្មៅ​ ពាក់​ស្លាក​លេខ​ ភ្នំពេញ​2AA-4333 ដោយ​ធ្វើ​ដំណើរ​តាម​បណ្ដោយ​ផ្លូវ​កម្ពុជា​ក្រោម​ ក្នុង​ទិសដៅ​ពី​កើត​ទៅ​លិច​ និងក្នុង​ល្បឿន​យ៉ាង​លឿន​។ លុះមក​ដល់​ចំណុច​កើត​ហេតុ​រថយន្ត​បង្ក​ខាង​លើ​ស្រាប់​តែ​រេចង្កូត​ទៅ​ខាង​ឆ្វេង​ទៅ​បុករបាំងថ្ម​ពុះ​ចែក​ទ្រូង​ផ្លូវ​បណ្ដាល​ឲ្យវាច​អស់​២​កង់​។ ចំណែកឯ​រថយន្ត​បង្ក​រងការ​ខូចខាត​ក្រពឹត​កាង​និង​ដាក់​ក្រឡេកង់ខាងមុខ​ចំហៀង​ខាង​ខាង​ឆ្វេង​ទៅ​មុខ​លែង​រួច​។ ភ្លាមៗនេះអ្នកបើកបររថយន្តបង្ក​បាន​គេច​ខ្លួន​ចេញ​ពី​កន្លែង​កើត​ហេតុ​បាត់​ស្រមោល​​។

ក្រោម​ពេល​កើត​ហេតុ​រថយន្ដ​បង្ក​ខាង​លើ​ត្រូវ​បាន​សមត្ថកិច្ច​ជំនាញ​ធ្វើការ​ស្ទូច​យកទៅ​រក្សាទុក​នៅអធិការដ្ឋាននគរបាលខណ្ឌ​ទួលគោក​ដើម្បី​រង់ចាំ​ម្ចាស់​ចូល​ខ្លួន​មក​ធ្វើ​ការ​ដោះស្រាយ​គ្នាទៅ​តាម​ផ្លូវ​ច្បាប់​នៅ​ពេល​ក្រោយ​៕​