កណ្តាល: នៅវេលាម៉ោង៧និង ៣០នាទី យប់ថ្ងៃទី១៩ ខែមិថុនា ឆ្នាំ២០១៨ មានករណីគ្រោះថ្នាក់ចរាចរណ៍មួយបានកើតឡើង រវាងម៉ូតូ និងម៉ូតូ បណ្តាលឲ្យស្លាប់អ្នកបើកបរម៉ូតូម្នាក់ជាមនុស្សប្រុស និងរបួសធ្ងន់២នាក់ក្នុងនោះមានស្រីម្នាក់ ព្រមទាំងខូចខាតម៉ូតូ២គ្រឿងធ្ងន់ធ្ងរ នៅចំណុចផ្លូវលេខ១១០​ ភូមិពោធិកណ្តាល​ ឃុំត្រើយស្លា​ ស្រុកស្អាង​ ខេត្តកណ្តាល។

ករណីនេះកើតឡើងរវាងម៉ូតូ​ម៉ាកសង់កូរ៉េ​(CT-100) ពណ៌ក្រហម​ ពាក់ស្លាកលេខ កណ្តាល 1X-​6492 បើកបរដោយ ឈ្មោះ​ តេវ​ ភេទប្រុស អាយុ​២៦ឆ្នាំ ជនជាតិវៀតណាម (មិនពាក់មួក) មានទីនៅភូមិព្រែករុន​ ឃុំព្រែកគយ​ ស្រុកស្អាង ខេត្តកណ្តាល(របួសធ្ងន់)​ បើកបរទិសដៅពីត្បូងទៅជើង ។ លុះមកដល់ចំណុចកើតហេតុក៏បានបុកគ្នាជាមួយម៉ូតូ​ម៉ាកហុងដាសេ១២៥ ពណ៌ខ្មៅ​ ពាក់ស្លាកលេខ​ កណ្តាល 1U-5769​ បើកបរដោយឈ្មោះ​ សួន សារិត​ ភេទប្រុស អាយុ​៣២ឆ្នាំ (ស្លាប់)​ មុខរបរ កម្មករ​ (មិនពាក់មួក) រួមដំណើរជាមួយប្រពន្ធឈ្មោះ​ សែម ចរិយា ភេទស្រី​ អាយុ​២៧ឆ្នាំ​(របួសធ្ងន់) មុខរបរកម្មករ(មិនពាក់មួក) មានទីលំនៅនៅភូមិជ្រោយឬស្សី​ ឃុំប្រសាទ ស្រុកស្អាង​ ខេត្តកណ្តាល​ ដែលបើកបញ្ច្រាសទិសគ្នាពីជើងមកត្បូង បណ្ដាលឲ្យស្លាប់បុរសម្នាក់នៅកន្លែងកើតហេតុ និងរងរបួសធ្ងន់២នាក់ ក្នុងនោះមានស្រីម្នាក់។

ក្រោយកើតហេតុ សមត្ថកិច្ចបានធ្វើការវាស់វែងប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី។ រីឯអ្នករងរបួសត្រូវបានបងប្អូនដឹកយកទៅសង្គ្រោះនៅភ្នំពេញ។ ចំណែកវត្ថុតាងទាំង២បានយកមករក្សាទុកនៅអធិការដ្ឋាន នគរបាលស្រុកស្អាង ដើម្បីកសាងសំណុំរឿងទៅតាមនីតិវិធីនៃច្បាប់៕