Post News Media ព័ត៌មានជាតិ ម៉េង កែវពេជ្ជ...

ម៉េង កែវពេជ្ជតា ប្រឈមបណ្ដឹងតុលាការ

ភ្នំពេញ: អ្នកច្បាប់ បានអះអាងថា សារជេរប្រមាថ និងបរិហារយ៉ាងចាស់ដៃរបស់អ្នកនាង ម៉េង កែវពេជ្ជតា គឺអាចជាប់ក្នុងបណ្ដឹងបានយ៉ាងស្រួល។ សម្ដីដែលអ្នកនាងបង្ហោះឡើង ត្រូវអ្នកច្បាប់បញ្ជាក់ថា អាចត្រូវចោទប្រកាន់ពីបទប្រមាថ និងបរិហារកេរ្តិ៍ ដែលច្បាប់ ត្រូវហាមឃាត់ ព្រោះបានធ្វើឲ្យប៉ះពាល់ដល់សេចក្ដីថ្លៃថ្នូរ និងកិត្តិយសអ្នកដទៃ។

ប្រធានអង្គការជំនួយផ្នែកច្បាប់ លោកមេធាវី សុខ សំអឿន បានឲ្យដឹងថា មិនថា តារាសិល្ប: ឬមិនមែនអ្នកសិល្ប:នោះទេ សុទ្ធតែអាចប្រតិកម្ម នូវអ្វីដែលអ្នកសារព័ត៌មានសរសេរខុសទាំងអស់។ ប៉ុន្តែប្រតិកម្ម មិនមែនជាការជេរប្រមាថ ដែលនាំឲ្យក្លាយការមាក់ងាយ និងបរិហារនាំឲ្យជាប់ពិរុទ្ធខ្លួនឯង នៅពេលគេប្ដឹងបកនោះទេ គឺត្រូវសរសេរជាលាយលក្ខណ៍អក្សរ ឬទាក់ទងដោយផ្ទាល់ ដើម្បីឲ្យមានការកែតម្រូវ។ លោកបន្តថា ក្នុងករណីមិនមានការកែសម្រួល សាមីខ្លួន អាចនឹងដាក់បណ្ដឹងទាមទារជំងឺចិត្ត ដោយករណីនោះ មិនមានជាប់គុកនោះទេ។ ផ្ទុយទៅវិញ ប្រសិនបើតារាសិល្ប: ឬអ្នកដែលត្រូវស្ថាប័នគេចុះផ្សាយ មិនទាន់សុំឲ្យមានការសម្រួល ហើយបែរជាជេរប្រមាថជាលក្ខណ:សាធារណ: បង្កឲ្យប៉ះពាល់ដល់កិត្តិយសរបស់ស្ថាប័នរបស់គេ និងសាមីខ្លួនរបស់អ្នកសរសរវិញ នោះក៏ត្រូវប្រឈមផ្លូវច្បាប់ពីបទប្រមាថ និងបរិហារកេរ្តិ៍ដូចគ្នា។

លោក សុខ សំអឿន បានបញ្ជាក់យ៉ាងដូច្នេះ «បើយើងគ្រាន់តែរិះគន់ធម្មតាៗ វាអត់មានអីទេ ប៉ុន្តែបើជាការជេរប្រមាថ មាក់ងាយ ធ្វើឲ្យប៉ះពាល់ដល់សេចក្ដីថ្លៃថ្នូររបស់គេ ហើយបញ្ចេញឈ្មោះស្ថាប័នគេ ឬបុគ្គលណាម្នាក់ ដោយចំៗផង គឺគេអាចប្ដឹងបាន! ព្រោះតាមច្បាប់រាល់ការបង្ហោះ ឲ្យតែមានលក្ខណ:ជាសាធារណ: ដែលមានមនុស្សចាប់ពីរាប់រយនាក់មើលឃើញ គឺចូលក្នុងច្បាប់សម្រាប់ដាក់បណ្ដឹងហើយ បើនៅស្រុកគេត្រឹមតែ២០០នាក់(អ្នកឃើញ អ្នកឮ) គឺចូលហើយ!»។

តែទោះយ៉ាងណា លោក សុខ សំអឿន ថា ករណីដែលលោកលើកឡើង មិនឈានដល់បញ្ហាជាប់គុកជាប់ច្រវ៉ាក់នោះទេ ដោយគ្រាន់តែជាការទាមទារសំណងតាមការទាមទាររបស់ដើមបណ្ដឹង និងអាស្រ័យទៅតាមទំហំ នៃការខាតបង់កិត្តិយសប៉ុណ្ណោះ។ លោកថា «រាល់ការបង្ហោះដែលមានអត្ថន័យប៉ះពាល់ដល់ភាពថ្លៃថ្នូររបស់ស្ថាប័នមួយ ឬដល់បុគ្គលណាមួយ វាចូលក្នុងបទប្រមាថ និងបរិហាកេរ្តិ៍ជាសាធារណ:ហើយ ចឹងទើបការបង្ហោះស្អីៗ នៅតាមហ្វេសប៊ុក គឺយើងត្រូវតែប្រយ័ត្ន!»។ លោកក៏បានអះអាងដែរថា បណ្ដាញហ្វេសប៊ុក ត្រូវបានចាត់ចូលជាប្រព័ន្ធផ្សព្វផ្សាយ ដែលមានលក្ខណ:ជាសាធារណ:ដូចគ្នា ឲ្យតែគណនីហ្វេសប៊ុកនោះ មានមិត្ត (Friend) ឬមានអ្នកចូលចិត្ត (Like) ចាប់ពីរាប់រយរាប់ពាន់នាក់ឡើងទៅ។ ដូច្នេះ រាល់ការជេរប្រមាថ គឺមិនគួរនឹងប្រើជាសាធារណ:នៅតាមបណ្ដាញនេះទេ ជាពិសេសចំពោះសំណេរដែលធ្វើឲ្យប៉ះពាល់ដល់បុគ្គលណាមួយ។

ពាក់ព័ន្ធនឹងបញ្ហានេះ Post News នៅមិនទាន់ពិចារណារឿងផ្លូវច្បាប់លើករណីនេះទេ ដោយរង់ចាំមើលប្រតិកម្មបន្ថែមទៀតរបស់អ្នកនាង ម៉េង កែវពេជ្ជតា។ តំណាង Post News បានបញ្ជាក់ថា ស្ថាប័នរីករាយកែតម្រូវព័ត៌មាន បើមានសំណើសុំពីសាមីពាក់ព័ន្ធ ដើម្បីជាការទទួលខុសត្រូវ និងក្នុងន័យសុំទោស ប៉ុន្តែក្រោយការបង្ហោះសំណេរជេរប្រមាថ និងបរិហារកេរ្តិ៍ ជាសាធារណ:ធ្វើឲ្យប៉ះពាល់ធ្ងន់ធ្ងរដល់ស្ថាប័ន Post News និងភ្នាក់ងាររបស់ស្ថាប័ន អ្នកនាងត្រូវធ្វើការទទួលខុសត្រូវ និងត្រូវធ្វើការសុំទោសជាសាធារណ:ដូចគ្នា។

គួរបញ្ជាក់ផងដែរថា រឿងរ៉ាវដែលបានកើតឡើង គឺបន្ទាប់ពី Post News បានចុះផ្សាយអត្ថបទក្រោមចំណងជើងថា «ម៉េង កែវពេជ្ជតា រលឹករឿងអាស្រូវអតីតស្វាមី» នាព្រឹកថ្ងៃទី២១ ខែមិថុនា ឆ្នាំ២០១៦ ដោយដកស្រង់សម្ដីរៀបរាប់ពីការតស៊ូរបស់អ្នកនាង ក្នុងពេលបែកបាក់ស្វាមី ដែលអ្នកនាងបានថ្លែង កាលពីថ្ងៃទី១៩ ខែមិថុនា ក្នុងពិធីប្រគំតន្ត្រីជួយល្ខោនខោល ហើយនៅវេលាម៉ោង៩៖១៦នាទី យប់ថ្ងៃដដែល អ្នកនាង ក៏បានបង្ហោះសារវាយប្រហារ និងបានជេរប្រមាថយ៉ាងចាស់ដៃ ដែលមានភ្ជាប់ដំណរ(Link)របស់អត្ថបទព័ត៌មាននេះឡើង ដោយមិនបានស្នើសុំឲ្យមានការកែតម្រូវ៕

Loading...