ព័ត៌មានជាតិ

លួចបានវាគ្រាន់ ដល់ប៉ូលិសតាមទាន់ មានអីខ្នោះបានសម្រេច

តាកែវ: សមត្ថកិច្ចឃាត់ខ្លួន ជនសង្ស័យម្នាក់ ក្រោយធ្វើសកម្មភាពឆក់កាបូបយួដៃពីស្ត្រីម្នាក់ កាលពីថ្ងៃទី១៣ ខែកក្កដា ឆ្នាំ២០១៨ នៅចំណុចភូមិឫស្សីជុំ ឃុំទ្រា ស្រុកសំរោង។

ជនរងគ្រោះឈ្មោះ អ៊ូច ពៅ ភេទស្រី អាយុ៤៣ឆ្នាំ រស់នៅភូមិឃុំកើតហេតុ ត្រូវជនសង្ស័យលួចយកប្រាក់ចំនួន ៥០.០០០៛ (ប្រាំម៉ឺនរៀល)​ ក្នុង​កាបូប រួចក៏ជិះម៉ូតូ​គេច​ខ្លួនបាត់។

តាមសមត្ថកិច្ច បានឲ្យដឹងថា នៅវេលាម៉ោង ១២ និង៣០នាទីរសៀលថ្ងៃដដែល ជនសង្ស័យបានធ្វើ​សកម្មភាព​ឆក់កាបូប​ម្ដង​ទៀត នៅចំណុចខាងកើតកោះព្នៅ ស្ថិតក្នុងភូមិសែនភាស ឃុំទ្រា ស្រុកសំរោង ដោយ​ឆក់កាបូបយួដៃរបស់ស្ត្រីរងគ្រោះឈ្មោះ ច្រិង ផល្លី អាយុ ២៤ឆ្នាំ រស់នៅភូមិអង្គរ ឃុំ​ព្រែក​ផ្ទោល​​ ស្រុកអង្គរបូរី ដោយក្នុងកាបូប មានទូរស័ព្ទដៃ ១ គ្រឿង ។

ក្រោយទទួលបានដំណឹងភ្លាមៗ កម្លាំងអធិការដ្ឋាននគរបាលស្រុកសំរោង សហការជា​មួយកម្លាំងប៉ុស្តិ៍នគរបាលរដ្ឋបាលចំណុះអធិការដ្ឋាន បានចុះអន្តរាគមន៍ ពួនស្ទាក់គ្រប់ច្រកល្ហក រហូតឈានដល់ឃាត់​ខ្លួនជន​សង្ស័យខាងលើ នៅ​ចំណុចផ្លូវលំ ស្ថិតក្នុងភូមិ​ទួលទ្រា ឃុំលំចង់ ស្រុកសំរោង។
ជនសង្ស័យ ឈ្មោះ សុ​​ គីម ភេទ​ប្រុស អាយុ២៨ឆ្នាំ រស់​នៅ​ភូមិបឹងត្រាញ់ ឃុំបឹងត្រាញ់ខាងត្បូង ស្រុកសំរោង។

សម្ភារដកហូតបាន រួមមានម៉ូតូ១ គ្រឿងម៉ាកC125 ពណ៌ខ្មៅ ស៊េរី២០១៦ ពាក់ស្លាកលេខ ភ្នំពេញ1FP-0420 ដែលជនសង្ស័យជិះធ្វើសកម្មភាព។

បច្ចុប្បន្នជនសថ្ស័យ និងវត្ថុតាង កំពុងត្រូវបានកម្លាំង ជំនាញធ្វើការសាកសួរ និងកសាង​​​​​សំណុំរឿងតាមនីតិវិធី៕

មតិយោបល់