ភ្នំពេញ: កុងតឺន័រ២គ្រឿង បើកជែងគ្នាជ្រុលទៅបុករ៉ឺម៉កម៉ូតូកង់បីដែលបើកបរដោយបុរសម្នាក់ បណ្តាលឲ្យក្រឡាប់រ៉ឺម៉កខ្ទេចស្ទើរទាំងស្រុង និងបណ្តាលឲ្យអ្នកបើកបររងរបួសយ៉ាងធ្ងន់ធ្ងរ។
ហេតុការណ៍ខាងលើបង្កឲ្យមានការភ្ញាក់ផ្អើលកាលពីវេលាម៉ោង៩និង៤៥នាទីយប់ ថ្ងៃទី១៧ ខែកក្កដា ឆ្នាំ២០១៨ តាមបណ្ដោយផ្លូវជាតិលេខ៣ ក្នុងភូមិអង្គតាគៀត សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ ។
បើតាមអត្តសញ្ញាណប័ណ្ណដែលនៅជាប់នឹងខ្លួនជនរងគ្រោះមានឈ្មោះ វ៉ា ចន្ថា ភេទប្រុស អាយុ៤៦ឆ្នាំ មុខរបររត់រ៉ឺម៉កកង់បី មានស្រុកកំណើតនៅភូមិកន្ទួតប្រោង ឃុំគោកព្រីង ស្រុកស្វាយជ្រំ ខេត្តស្វាយរៀង។
តាមប្រភពព័ត៌មាននៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញជនរងគ្រោះបើកបររ៉ឺម៉កកង់បី ក្នុងទិសដៅពីត្បូងទៅជើង ក្នុងល្បឿនយ៉ាងលឿន លុះមកដល់ចំណុចកើតហេតុ ស្រាប់តែមានរថយន្តកុងតឺន័រចំនួន២គ្រឿងបានបើកជែងគ្នាជ្រុលទៅបុករ៉ឺម៉កម៉ូតូកង់បីខាងលើពេញទំហឹង បណ្តាលឲ្យរ៉ឺម៉កម៉ូតូកង់បីក្រឡាប់ផ្ងារជើងរងការខូចខាតខ្ទេច ។ ចំណែកអ្នកបើកបររ៉ឺម៉កកង់បីបានរងរបួសបាក់ដៃផ្នែកខាងស្តាំយ៉ាងធ្ងន់ធ្ងរ ។
តាមប្រភពព័ត៌មានបានបន្តទៀតថា ភ្លាមៗនោះជនរងគ្រោះខាងលើត្រូវបានរថយន្តគ្លីនិកឯកជនបានដឹកយកទៅសង្គ្រោះភ្លាមៗផងដែរ។ ចំណែកឯរថយន្តកុងតឺន័រទាំង២គ្រឿងបានបើកគេចខ្លួនបាត់ស្រមោល ។ នៅពេលនោះដែរ រ៉ឺម៉កកង់បីដែលក្រឡាប់ឡើងរមូរងការខូចខាតខ្ទេចនៅកណ្តាលផ្លូវបង្កឲ្យមានកកស្ទះចរាចរណ៍ ត្រូវបានប្រជាពលរដ្ឋជួយរុញអូសចេញពីកន្លែងកើតហេតុភ្លាមៗផងដែរ។
ក្រោយពេលកើតហេតុ ដោយសារជនរងគ្រោះរងរបួសធ្ងន់ធ្ងរពេកខាងគ្លីនិកឯកជនបានបញ្ជូនបន្តទៅព្យាបាលនៅមន្ទីរពេទ្យព្រះកុសុម:។ ចំណែករ៉ឺម៉កម៉ូតូកង់បីត្រូវបាននគរបាលប៉ុស្តិ៍កន្ទោកដឹក និងស្ទូចយកទៅរក្សាទុក រង់ចាំប្រគល់ជូនជនរងគ្រោះវិញ៕
មតិយោបល់