Post News Media ព័ត៌មានជាតិ រថយន្តដឹកទឹកក...

រថយន្តដឹកទឹកកកពន្លះម៉ូតូDuke របស់មន្ត្រី​នគរបាល​ការពារ​ព្រំដែន​គោកវរ:សេនាតូចលេខ៨២១ ស្លាប់២នាក់ រួចជ្រុលទៅបុកផ្ទះប្រជាពលរដ្ឋ

ប៉ៃលិន: គ្រោះថ្នាក់ចរាចរណ៍មួយបានកើតឡើង រវាងរថយន្តដឹកទឹកកក និងម៉ូតូDuke បណ្តាលឲ្យស្លាប់មនុស្សប្រុសស្រី២នាក់ ក្នុងនោះមានម្នាក់ជាមន្ត្រី​នគរបាល​ការពារ​ព្រំដែន​គោកវរ:សេនាតូចលេខ៨២១។

ហេតុការណ៍នេះកើតឡើងកាលពីវេលាម៉ោង៣និង១០នាទី រសៀលថ្ងៃទី២១ ខែកក្កដា ឆ្នាំ២០១៨ ស្ថិតនៅចំណុច​ភូមិ​ឈើក្រំ ឃុំ​ស្ទឹងកាច់​ ស្រុក​សាលាក្រៅ​ ខេត្ត​ប៉ៃលិន​។

សមត្ថកិច្ចបានឲ្យដឹងថា ជនរងគ្រោះទី០១​ ឈ្មោះ ជួន ផាន់ណា ភេទប្រុស អាយុ ២៦ឆ្នាំ មុខរបរ មន្ត្រី​នគរបាល​ការពារ​ព្រំដែន​គោកវរ:សេនាតូចលេខ៨២១ បើកម៉ូតូម៉ាក​ Duke ពណ៌ស​ លាយខ្មៅ ពាក់ស្លាកលេខ​ ភ្នំពេញ​ 1FK-4199 ​បាន​ស្លាប់​បាត់បង់​ជីវិត​។ ជនរងគ្រោះទី០២​ ឈ្មោះ សាន វាសនា ភេទស្រី អាយុ១៨ឆ្នាំ រស់​នៅ​ភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន​ អ្នក​រួម​ដំណើរ​​បាន​ស្លាប់​បាត់បង់​ជីវិត​។

ចំណែក​ជន​បង្ក​មាន​គ្នា​ ២នាក់​៖
១-ឈ្មោះ ណាន់ វិន ភេទប្រុស អាយុ១៨ឆ្នាំ មុខរបរ បើក​រថយន្ត​ដឹកទឹកកក រស់​នៅភូមិអូតាប្រាង សង្កាត់ប៉ៃលិន ក្រុងប៉ៃលិន ខេត្តប៉ៃលិន បើកបរ​រថយន្ត​ម៉ាក​ Hyundai ពណ៌ខៀវស ពាក់ស្លាកលេខ ភ្នំពេញ 3C-3096។
២-ឈ្មោះ​ សាន សិទ្ធ ភេទ ប្រុស អាយុ ១៨ឆ្នាំ​ បុខរបបកម្មករលីទឹកកក​ រស់នៅ​ភូមិ​ឃុំ​ជាមួយ​គ្នា​។

ករណី​ខាងលើ​បណ្ដាល​មកពី​អ្នក​បើកបរ​រថយន្ត​ ខ្វះ​ការ​ប្រុងប្រយ័ត្ន​ បណ្ដាល​ឲ្យ​បុក​ជនរងគ្រោះ​កំពុង​ជិះ​ម៉ូតូ​ រួច​ជ្រុល​ទៅ​បុក​ផ្ទះ​របស់​ប្រជាពលរដ្ឋ​ខូចខាត​អស់​មួយ​ខ្នង​ទៀត​។

បច្ចុប្បន្ន​សាកសព​ជនរងគ្រោះ​ត្រូវ​បាន​ប្រគល់​ឲ្យ​ក្រុម​គ្រួសារ​ដើម្បី​យក​ទៅ​ធ្វើ​បុណ្យ​តាម​ប្រពៃណី។​ ចំណែក​រថយន្ត​ និង​ម៉ូតូ​ត្រូវ​បាន​យក​មក​រក្សាទុក​នៅ​ស្នងការដ្ឋាននគរបាលខេត្ដប៉ៃលិន​ដើម្បី​រង់ចាំ​ធ្វើការ​ដោះស្រាយ​៕