ភ្នំពេញៈ ជនសង្ស័យម្នាក់ ត្រូវបានសមត្ថកិច្ចខណ្ឌពោធិ៍សែនជ័យ សហការជាមួយប៉ុស្តិ៍ចោមចៅ២ ធ្វើការឃាត់ខ្លួនពីបទរក្សាទុកនូវសារធាតុញៀន ដោយនៅពេលឃាត់ខ្លួននោះ ស្រាប់តែជនសង្ស័យ ដកកាំភ្លើងជ័រមួយដើម ទៅភ្ជង់សមត្ថកិច្ច បង្កឲ្យមានការភ្ញាក់ផ្អើល កាលពីវេលាម៉ោង១២និង៤០នាទីរំលងអធ្រាត្រ ឈានចូលថ្ងៃទី២៦ ខែកក្កដា ឆ្នាំ២០១៨ ស្ថិតនៅភូមិថ្មគោល១ សង្កាត់ចោមចៅ២ ខណ្ឌពោធិ៍សែនជ័យ។
ជនសង្ស័យឈ្មោះ ភាច និមល ភេទប្រុស អាយុ៣៨ឆ្នាំ មុខរបរមើលកូននៅផ្ទះ ស្នាក់នៅភូមិឃុំខាងលើ មានស្រុកកំណើតនៅភូមិត្រពាំងព្រៃ ស្រុកជលគិរី ខេត្តកំពត។
តាមសមត្ថកិច្ច បានឲ្យដឹងថា នៅមុនពេលកើតហេតុ ពួកគាត់បានចុះល្បាតនៅក្នុងភូមិសាស្ត្រខាងលើ លុះមកដល់ចំណុចកើតហេតុ ស្រាប់តែឃើញជនសង្ស័យម្នាក់ កំពុងដើរតាមផ្លូវម្នាក់ឯង មានពាក់មួកទាហាន ក៏មានការសង្ស័យ ទើបឃាត់ខ្លួន និងឆែកឆេរ ស្រាប់តែជនសង្ស័យ បានយកកាំភ្លើងជ័រភ្ជង់សមត្ថកិច្ចវិញ ធ្វើឲ្យសមត្ថកិច្ចភិតភ័យ ប៉ុន្តែពេលភ្ជង់ទៅកាំភ្លើងនោះស្រាល ទើបសមត្ថកិច្ចដឹងថា ជាកាំភ្លើងជ័រ ភ្លាមៗនោះ កម្លាំងសមត្ថកិច្ច បានទះជនសង្ស័យ២-៣ដៃម្នាក់ បណ្តាលឲ្យរងរបួសយ៉ាងដំណំ ហើយបានធ្លាក់ថ្នាំញៀនចេញពីខ្លួនចំនួនមួយកញ្ចប់ បន្ទាប់សមត្ថកិច្ច ក៏បាននាំជនសង្ស័យទៅសាកសួរបន្តនៅប៉ុស្តិ៍នគរបាលរដ្ឋបាលចោមចៅ២ ដើម្បីកសាងសំណុំរឿង ចាត់បន្តការតាមនីតិវិធី៕
មតិយោបល់