ព័ត៌មានជាតិ

ក្រុមជួញដូរ និងសេពគ្រឿងញៀន ៦នាក់ ក្នុងផ្ទះសំណាក់ ឡា លីន​ ត្រូវសមត្ថកិច្ចចាប់ក្របួចចូលប៉ុស្តិ៍

កណ្ដាល:​ កាលពីវេលាម៉ោង២ រសៀល​ថ្ងៃទី​០១​ ខែ​សីហា​ ឆ្នាំ២០១៨ កម្លាំងសមត្ថកិច្ច បានចុះបង្ក្រាបក្រុមជួញដូរ និងសេពគ្រឿងញៀនប្រុសស្រី ​៦នាក់​ រួមនឹងថ្នាំ​ញៀន​ចំនួន​ជាង​៣០កញ្ចប់​ នៅចំណុចក្នុងផ្ទះសំណាក់ឡា លីន ស្ថិតក្នុងភូមិដើមមាន សង្កាត់ដើមមាន ក្រុងតាខ្មៅ។

ប្រតិបត្តិការបង្រ្កាបនេះ មានការចូលរួមពីកម្លាំងមន្ទីរប្រឆាំងបទល្មើសគ្រឿងញៀនក្រសួងមហាផ្ទៃ សហការជាមួយកម្លាំងការិយាល័យប្រឆាំងគ្រឿងញៀនខេត្តកណ្តាល ក្រោមការសម្របសម្រួលពីលោក ទិន សុចិត្រ ព្រះរាជអាជ្ញាររងអមសាលាដំបូងខេត្តកណ្តាល។

សមត្ថកិច្ចបានឲ្យដឹងថា មុននឹងឈានដល់ការបង្ក្រាបនេះ សមត្ថកិច្ចបានឃាត់ខ្លួនជនសង្ស័យ ២នាក់ នៅឯភ្នំពេញ បន្ទាប់ពីធ្វើការសាកសួររួច ទើបឈានដល់ការស្រាវជ្រាវ និងបាន​ចូល​ដល់​ក្នុង​បន្ទប់​លេខ​១០១ និង​១០២​នៃ​ផ្ទះ​សំណាក់​ ​ឡា លីន​ មាន​ទីតាំង​ខាងលើ ក៏បាន​ឃើញ​មនុស្ស​ប្រុស​ស្រី​៦ នាក់ ​កំពុង​ជក់​គ្រឿង​ញៀន​ រួមនឹងគ្រឿងញៀនជាង៣០កញ្ចប់ និងវត្ថុតាងវេចខ្ចប់មួយចំនួនទៀត។

បច្ចុប្បន្នជនសង្ស័យខាងលើ ត្រូវបានកម្លាំងជំនាញបញ្ជូនទៅកាន់មន្ទីរប្រឆាំងបទល្មើសគ្រឿងញៀនក្រសួងមហាផ្ទៃ ដើម្បីធ្វើការសាកសួរ និងកសាងសំណុំរឿង ចាត់ការបន្តតាមផ្លូវច្បាប់៕

មតិយោបល់