ផ្ទះ ព័ត៌មានជាតិ អាជ្ញាធរថៃ រ...

អាជ្ញាធរថៃ រឹតបន្តឹងលើពលរដ្ឋខ្មែរយកមធ្យោបាយចូលថៃតាមច្រកម៉ាឡៃ

0

បន្ទាយមានជ័យ: ទាហានឈុត​ខ្មៅ ​និងប៉ារ៉ារបស់ថៃ ប្រចាំច្រកតំបន់ព្រំដែនណងព្រឺឈម ​និងច្រកតំបន់ម៉ាឡៃ កំពុងតែ​រឹតបន្តឹងការចេញចូលរបស់ពលរដ្ឋខ្មែរ ជាពិសេស​ចំពោះការ​យក​រថយន្តចូលតម្រូវឲ្យមានការ​ថតរូប​ជាប់​​ នឹងរថយន្តដែលខ្លួនយកចូល ​បីដូច​ជាអ្នកទោស ខណ:ដែល​​ការ​ចូលរបស់ថៃមកកម្ពុជា មានភាពប្រក្រតីធម្មតា។

ការរឹតបន្តឹង និងតម្រូវឲ្យថតរូបខាងលើ ពីសំណាក់ទាហានឈុតខ្មៅ ឬប៉ារ៉ាថៃ បានធ្វើមកលើ​ប្រជា​​ជនកម្ពុជា បាន១សប្តាហ៍​ទៅហើយ​​ បន្ទាប់ពីការ​ហាមមិនឲ្យ​រថយន្ត​​ក្រៅពីមន្ត្រីរាជការចូល រយ:​ពេល១ខែមកហើយ ។

អ្នកស្រី ឃឹង សុវត្ថនី ប្រធានគណ:កម្មការត្រួតពិនិត្យច្រកទ្វារព្រំដែន តំបន់ម៉ាឡៃ បានឲ្យ​ដឹងថា ពីមួយថ្ងៃទៅមួយថ្ងៃ ភាគីថៃជាពិសេសទាហានឈុតខ្មៅ ដែលប្រចាំនៅច្រកណងព្រឺឈម និងច្រកតំបន់ម៉ាឡៃ ដែលអ្នកស្រី គ្រប់គ្រង បានរឹតបន្តឹង ហាមពលរដ្ឋខ្មែរ ដែលមានមធ្យោបាយជា រថយន្ត ម៉ូតូ ធ្លាប់ចេញចូលតាមច្រកនេះ ទៅស្រុកអារញ្ញ ​រយ:ពេល១ខែមកហើយ ស្រាប់តែថ្មីៗនេះ ពួកគេបានប្រើមធ្យោបាយឲ្យពលរដ្ឋខ្មែរ ដែលចង់យកមធ្យោបាយ ជាម៉ូតូ និងរថយន្ត ត្រូវតែថតរូបជាប់ នឹងរថយន្តបីដូចជាអ្នកទោស ​ទើបអនុញ្ញាតឲ្យចូលបាន ដែលការធ្វើបែបនេះ ភាគីថៃ មិនបានជូនដំណឹងជាលាយលក្ខអក្សរជាមុន​ មកខាងកម្ពុជាឡើយ ដែលទង្វើនេះ វាខុសទៅនិងការឯកភាពភាគីទាំង២ កន្លងមក ដែលអនុញ្ញាតឲ្យខាង​គណ:កម្មការច្រកតំបន់ ម៉ាឡៃ អាចឲ្យពលរដ្ឋ ឬមន្ត្រីរាជការខាងកម្ពុជា ប្រើប្រាស់រថយន្ត ចូលដីថៃ ទៅផ្សារឡូតាត់ ​នៃស្រុកអារញ្ញបាន។

ទោះបីជាភាគីថៃបាន ធ្វើដោយឯកតោភាគីយ៉ាងណាក៏ដោយ ក៏ខាងកម្ពុជា មិនបាន ​តបត រឹតបន្តឹង ការចូលរបស់ភាគីថៃឡើយ គឺនៅតែអនុញ្ញាតឲ្យរថយន្តធំតូចក្នុងមួយថ្ងៃៗ រាប់សិបគ្រឿង ចូលធម្មតា។

តែបើយោងតាម កិច្ចព្រមព្រាង ថ្នាក់ភូមិភាគដែលបានជួបពិភាក្សាគ្នាកន្លងមក ភាគីទាំង២ឯកភាព ផ្តល់ភាពងាយស្រួល ដល់រថយន្តរបស់មន្ត្រីរាជការ និងប្រជាជននៃប្រទេសទាំង២ ដែលមាន ករណីបន្ទាន់ ដោយមានពុំមានលិខិតឆ្លងដែន និងប័ណ្ណឆ្លងដែន ក្នុងការទំនាក់ទំនងការងារចាំបាច់ ឬព្យាបាលរោគ ត្រូវឆ្លងកាត់ការិយាល័យទំនាក់ទំនងព្រំដែន ដោយភ្ជាប់ឯកសារជាផ្លូវការក្នុងពេលធ្វើដំណើរ។

ជាមួយគ្នានេះ អ្នកស្រី បានឲ្យដឹងទៀតថា ការិតបន្តឹងនេះ ប្រហែលខាងថៃ ខឹង​នឹង​ខាងខ្មែរដោយ ថៃចង់ សម្រេចជាឯកតោភាគីដាក់ម៉ាស៊ីនស្កែនខ្លួន ​និង​ស្នាមមេដៃ លើ​ជនកម្ពុជា ទាំងអស់ មិនថាពលរដ្ឋស៊ីឈ្នួលទៅព្រឹកវិលល្ងាច ​និងចូលទៅផ្សារណាត់​ តាមច្រកណងព្រឺ ដែលខុស​ពីអនុស្សារណ: ចាស់​រវាងភាគីទាំង២ពុំបានចែង។

ការធ្វើដូច្នេះ របស់ភាគីថៃ នៃច្រកតំបន់ម៉ាឡៃ-ណងព្រឺ វាមិនខុសពីអ្វីដែល ភាគីថៃ បានធ្វើឡើង រហូតមកដល់សព្វថ្ងៃ នៅច្រកអន្តរជាតិប៉ោយប៉ែត ឡើយ ដោយ​ដើមឡើយ ច្រកអន្តរជាតិ ប៉ោយប៉ែត ពលរដ្ឋទាំង២ប្រទេសជាពិសេសពលរដ្ឋខ្មែរ ចង់ចេញ​ចូលទៅផ្សាររុងក្លឿប្រទេសថៃ ដោយគ្រាន់តែទិញ​សំបុត្រតំលៃ១ពាន់រៀល ក្នុង១ សំបុត្រអាចចេញចូល បានតែបច្ចុប្បន្ន គឺភាគីថៃ ក្រៅពីទិញសំបុត្រ ​តម្រូវឲ្យធ្វើ​កាតសម្គាល់ដែលមានថតរូប​ និងស្កែនក្រយ៉ៅដៃ ដែល​មាន​សុពលភាពរយ:ពេល៦ខែ ឬធ្វើប័ណ្ណព្រំដែន ដែលហៅថា បដឺផាស់ ​ក៏តម្រូវឲ្យថតរូប និងស្កែនក្រយ៉ៅដៃផងដែរ ​ហើយការចេញចូលយករថយន្តក៏មានភាពតានតឹងដែលធ្វើឲ្យពិបាក ​សាំញ៉ាំ ចំណាយថវិកា ​និងពេលវេលា​សម្រាប់ចេញចូលទៅថៃ៕

Loading...