ភ្នំពេញៈ រថយន្តដឹកសាំងរបស់ក្រុមហ៊ុន SAVIMEX មួយគ្រឿង បានបើកទៅកៀររថយន្ត​Vistoមួយគ្រឿង និង បន្តទៅបុក រថយន្ត ម៉ាក Ford មួយគ្រឿងទៀត រងការខូចខាតយ៉ាងដំណំ ខណៈ​ដែលបើកសុខៗដាច់ហ្រ្វាំងជាន់មិនជាប់នោះ សំណាងល្អ មិនបានបង្កឲ្យមានអ្នកណាម្នាក់រងរបួសឡើយ។

ករណីគ្រោះថ្នាក់ចរាចរណ៍នេះដែរ បានកើតឡើងនៅវេលាម៉ោង ១២ និង ៣០នាទីថ្ងៃត្រង់ ថ្ងៃទី ២៨ ខែ សីហា ឆ្នាំ ២០១៨ នៅត្រង់ចំណុចផ្លូវលេខ ៦៣ កែងនិងផ្លូវលេខ ៣៧០ ក្នុងសង្កាត់ បឹងកេងកងទី១ ខណ្ឌចំការមន រាជធានីភ្នំពេញ។

តាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុ គេបានឃើញរថយន្តដឹកសាំងមួយគ្រឿង ព៌ណស ពាក់ស្លាកលេខ ភ្នំពេញ3B-7105 មួយគ្រឿងបើកបរដោយបុរសម្នាក់ ក្នុងទិសដៅពីកើតទៅលិច លុះមកដល់ចំណុចខាង លើ។បុរសអ្នកបើកបរក៏បានព្យាយាមជាន់ហ្វ្រាំងតែជាន់មិនជាប់ ក៏បានរេចង្កូតទៅកៀររថយន្តVisto ព៌ណទឹកប្រាក់ ពាក់ស្លាកលេខ​ ភ្នំពេញ2AP-3990 មួយគ្រឿងជាប់ទៅនឹងចិញ្ចើផ្លូវ និង បន្តទៅបុករថយន្តម៉ាក Ford ព៌ណប្រផេះ ពាក់​ស្លាកលេខ ភ្នំពេញ2AL-4978 មួយគ្រឿងទៀតបណ្តាលឲ្យរថយន្តទាំង ២គ្រឿងរងការខូចខាតយ៉ាងដំណំតែម្តង តែសំណាងល្អមិនបានបណ្តាលឲ្យមានអ្នកណាម្នាក់រងរបួសឡើយ។

ក្រោយពេលកើតហេតុ កម្លាំងមានសមត្ថកិច្ចមូលដ្ឋានក៏បានមកដល់កន្លែងកើតហេតុឲ្យធ្វើការដោះស្រាយគ្នា ដោយភាគីខាងរថយន្តដឹកសាំង យល់ព្រមយករថយន្តទាំង ២គ្រឿងដែលរងការខូចខាតទៅធ្វើការជួសជុលឲ្យ និងបញ្ចប់រឿងនៅនឹងកន្លែងកើតហេតុផងដែរ៕