Post News Media ព័ត៌មានជាតិ ​គយចល័តក្រសួង...

​គយចល័តក្រសួង ឆែកឆេរឃ្លាំងលក់គ្រឿងបន្លាស់រថយន្ត២កន្លែងក្នុងក្រុងសិរីសោភ័ណ សង្ស័យមិនបង់ពន្ធនាំចូល!

បន្ទាយមានជ័យ: ដោយមានការសង្ស័យ​ពីការបើកលក់គ្រឿងបន្លាស់រថយន្តមិនបានបង់ពន្ធទើបនៅព្រឹកថ្ងៃទី០៣ ខែកញ្ញា ឆ្នាំ២០១៨ កម្លាំងគយចល័តនៃការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥បានចុះប្រតិបត្តិការឆែកឆេរឃ្លាំងស្តុកគ្រឿងបន្លាស់ដ៏ធំមួយដែលមានយីហោ​ អ៊ឹង ​លាងប៉ូច(ហៅពត)ស្ថិតនៅចំនុចភូមិបីសង្កាត់ព្រះពន្លាក្រុងសិរីសោភ័ណខេត្តបន្ទាយមានជ័យ​ ​។

ប្រតិបត្តិការ​ឆែកឆេរនេះធ្វើឡើងក្រោមដឹកនាំរបស់លោក​ ឈួន​ សោភា​ប្រធានការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥នឹងសម្របសម្រួលដោយលោក​ មាស​ ចន្ទ័ពិសិដ្ឋ​ ព្រះរាជ្ញាអមអយ្យការសាលាដំបូងខេត្តបន្ទាយមានជ័យ។

ទីតាំងឃ្លាំងដែលរងការឆែកឆេរខាងលើប្រភពព័ត៌មានបានខ្សឹបខ្សាវថាជាច្រើនអណត្តិមេគយខេត្តមកហើយនិងជាច្រើនអណត្តិមេគយចល័តក្រសួងគឺមិនដែលមានការត្រួតពិនិត្យរឺឆែកឆេរម្តងណាទេ​ និយាយរួមគឺការបើកលក់របស់ថៅកែក្រុមហ៊ុនប្រព្រឹត្តទៅយ៉ាងរលូននិងសុខសាន្តបំផុត​ ។ ភាពសុខសាន្តនេះទំនងជាមានការទំនងល្អរវាងគយក្រសួងនិងគយខេត្តជាមួយថៅកែឃ្លាំង​ អ៊ឹង​ លាងប៉ូចហៅពត។ ប្រភពក៏បានបញ្ជាក់បន្ថែមផងដែរថា​ ក្រុមហ៊ុនរបស់ឈ្មោះ​ អ៉ឹង​ លាងប៉ូច​ ហៅ​ ពត​ មានឃ្លាំងស្តុកជាច្រើនកន្លែងទៀត​មិនមែនមានតែឃ្លាំងពីរដែលកំពុងឆែកឆេរនេះទេ​ ហើយទំនិញក្នុងឃ្លាំងទាំងអស់ភាគច្រើនមិនបានបង់ពន្ធនាំចូលមាត់ច្រកគ្រប់ចំនួនជូនរដ្ឋនោះទេ។

សូមបញ្ជាក់ដែរ​ថា​ប្រតិបត្តិការ​ឆែកឆេរនាព្រឹកនោះ​ គយបានរកឃើញទំនិញជាច្រើនប្រភេទក្នុងឃ្លាំងដែលមិនមានបិទតែមគយនាំចូលពីតាមមាត់ច្រក​ ហើយការរកឃើញនេះអាចនិងមានការផាកពន័យធ្ងន់ធ្ងរលើទំនិញដែលមិនបានបង់ពន្ធ។

អ្នកឃើញហេតុការណ៍នៃការឆែកឆេររប់ក្រុមមន្ត្រីគយល័តបានសាទរចំពោះចំណាត់ការនេះ​ ប៉ុន្តែក៏សំណូមពរសូមឲ្យបន្តធ្វើដូចភ្លៀងរលឹម​ព្រោះខេត្តបន្ទាយមានជ័យជាខេត្តដែលមានច្រករបៀងច្រើន​ ហើយអ្នករកស៊ីរត់ពន្ធក៏ច្រើនពិសេសឃ្លាំងស្តុកទំនិញដែលគេចពន្ធក៏ច្រើនដែរ​ ដើម្បីបង្កើនថវិកាពន្ធចូលរដ្ឋឲ្យកាន់កើនទ្វេរថែមទៀត៕