ភ្នំពេញៈ បុរស២នាក់ជិះម៉ូតូស៊ុយសាគីនិច មួយគ្រឿងចេញមកពីផឹកស៊ីជាមួយមិត្តភក្តិបម្រុងទៅផ្ទះវិញ ស្រាប់តែមានជនមិនស្គាល់មុខចំនួន២នាក់ ជិះម៉ូតូមកក្រោយហើយក៏ធាក់ទៅលើម៉ូតូរបស់បុរស២នាក់នោះបណ្តាលឲ្យដួល កាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី២៨ ខែកញ្ញា ឆ្នាំ២០១៨ ត្រង់ចំណុចខាងត្បូងមន្ទីរពេទ្យព្រះកុសុមៈ តាមបណ្ដោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ។
បើតាមសម្តីពីបុរសរងគ្រោះជាអ្នកបើកបរម៉ូតូបានឲ្យដឹងថានៅ មុនពេលកើតហេតុគាត់និងបុរសម្នាក់ទៀតជាមិត្តភក្តិនិងគ្នា បានជិះម៉ូតូមួយគ្រឿងម៉ាក ស៊ុយសាគីនិច ពណ៌ខ្មៅ ពាក់ស្លាកលេខ ភ្នំពេញ 1GU-1326។ ដែលទើបតែជិះចេញពីកន្លែងផឹកស៊ីជាមួយមិត្តភក្តិនៅម្តុំផ្សារដីហុយ ហើយបម្រុងជិះត្រឡប់ទៅផ្ទះវិញ។ ដោយធ្វើដំណើរតាមបណ្ដោយផ្លូវលេខ២៧១ ក្នុងទិសដៅពីជើងទៅត្បូង និងក្នុងល្បឿនលឿន។ លុះមកដល់ចំណុចកើតហេតុក៏ស្រាប់តែលេចមុខជនមិនស្គាល់មុខចំនួន២នាក់ជិះម៉ូតូមួយគ្រឿងមិនចាំម៉ាក មកពីក្រោយហើយក៏បានធ្វើសកម្មភាពលើកជើងធាក់ទៅលើម៉ូតូរបស់ពួកគេបណ្តាលឲ្យដួលរងការខូចខាត និងអ្នកបើកបររងរបួសបាក់ដៃខាងឆ្វេង។ ចំណែកឯអ្នកអង្គុយខាងក្រោយរងរបួសស្រាល ដោយឡែកជនមិនស្គាល់មុខចំនួនពីរនោះបានបន្ថែមល្បឿនជិះរត់គេចខ្លួនបាត់ស្រមោល។
ក្រោយពេលកើតហេតុបុរសរងគ្រោះទាំង២ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯគ្លីនិកហុងហាក់។ ចំណែកឯម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលទឹកថ្លាដើម្បីរង់ចាំជនរងគ្រោះមកទទួលយកទៅវិញនៅពេលក្រោយ៕
មតិយោបល់