ភ្នំពេញៈ នៅថ្ងៃទី ១៦ ខែតុលា ឆ្នាំ២០១៨ វេលាម៉ោង៣រសៀល កម្លាំងផ្នែកនគរបាលព្រហ្មទណ្ឌខណ្ឌចំការមន បានធ្វើការស្រាវជ្រាវ ឃាត់ខ្លួនជនសង្ស័យម្នាក់ ឈ្មោះ សល់ នី ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅផ្ទះគ្មានលេខ ផ្លូវលេខ៤៣៤ ភូមិ៤ សង្កាត់ទំនប់ទឹក ខណ្ឌចំការមន រាជធានីភ្នំពេញ (មានប្រើថ្នាំញៀន) ក្រោយពីពាក់ព័ន្ធករណីលួចរថយន្តកាលពីថ្ងៃទី១២ ខែសីហា ឆ្នាំ២០១៨ វេលាម៉ោង២និង៤៩នាទី រំលងអធ្រាត្រ ត្រង់ចំណុចមុខផ្ទះលេខ១៥ B ផ្លូវលេខ២៩២ ភូមិ៥ សង្កាត់បឹងកេងកង២ ខណ្ឌចំការមន ហើយត្រូវបានឃាត់ខ្លួននៅចំណុចមុខផ្ទះគ្មានលេខ ផ្លូវលេខ៤៣៤ ក្រុម៣៤ ភូមិ៤ (ផ្អេរ) សង្កាត់ទំនប់ទឹក ខណ្ឌចំការមន។

ចំណែកជនរងគ្រោះឈ្មោះ លឹម ស៊ុនហេង ភេទប្រុស អាយុ២៦ឆ្នាំ ខ្មែរ មុខរបរលក់ដូរ ស្នាក់នៅផ្ទះលេខ១៥ Bផ្លូវលេខ២៩២ ភូមិ៥ សង្កាត់បឹងកេងកង២ ខណ្ឌចំការមន រាជធានីភ្នំពេញ។

សម្ភារៈបាត់បង់រួមមាន៖ រថយន្ត ០១ គ្រឿង ម៉ាក TOYOTA CAMRY(ឆ្លាម) ពណ៌ទឹកប្រាក់ ស្លាកលេខភ្នំពេញ 2G-8396 ( របស់ជនរងគ្រោះ) ។

ប្រភពព័ត៌មានបន្តថា រហូតដល់ថ្ងៃទី ១៦ ខែតុលា ឆ្នាំ២០១៨ ​វេលាម៉ោង៣រសៀល សមត្ថកិច្ចបានធ្វើការស្រាវជ្រាវ ឃាត់ខ្លួនជនសង្ស័យម្នាក់ខាងលើ នៅចំណុចខាងលើ ហើយជនសង្ស័យបានសារភាពថា ខ្លួនមានបក្ខពួក២ នាក់ទៀតឈ្មោះ ចយ និងឈ្មោះ ផាន់ណា ជិះម៉ូតូ ០២ គ្រឿង បានធ្វើសកម្មភាពលួចរថយន្ត ជនរងគ្រោះ០១គ្រឿង ម៉ាក CAMRY ឆ្លាម ពិតប្រាកដមែន ។ ហើយឈ្មោះ ផាន់ណា បើករថយន្ត ដែលលួចបាន យកទៅលក់បាត់ មិនដឹងលក់កន្លែងណា បានប៉ុន្មាននោះទេ ហើយឈ្មោះ ផាន់ណា បានគេចខ្លួន ពីជនសង្ស័យទាំង ០២ នាក់ទៀត។

បច្ចុប្បន្ន ជនសង្ស័យខាងលើ កំពុងឃាត់ខ្លួននៅអធិការដ្ឋាន ដើម្បីកសាងសំណុំរឿងចាត់ការតាមនីតិវិធីច្បាប់បន្តទៀត៕