បន្ទាយមានជ័យៈ កាលពីវេលាម៉ោង១និង៤០នាទីរសៀល ថ្ងៃទី២៤ ខែតុលា ឆ្នាំ២០១៨ មានករណីគ្រោះថ្នាក់ចរាចរណ៍រវាងម៉ូតូនិងរថយន្ត បណ្តាលឲ្យបុរសម្នាក់ជាម្ចាស់ម៉ូតូរងរបួសធ្ងន់ នៅលើផ្លូវជាតិលេខ៥ ភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
នៅមុនពេលកើតហេតុ គេឃើញមានម៉ូតូម៉ាកគ្លិច ពណ៌ក្រហម ស្លាកលេខ ភ្នំពេញ 1F.3365 ជិះដោយឈ្មោះ ម៉ៅ រ៉ាបូ ភេទប្រុស អាយុ៣០ឆ្នាំ បុគ្គលិកផ្នែកអេឡិចត្រូនិចក្នុងក្រុមហ៊ុនកាស៊ីណូ ហូលីដេ ប៉ាឡេស ជិះក្នុងល្បឿនលឿនពីកើតទៅលិច លុះមកដល់កន្លែងកើតហេតុបានបុកជាមួយរថយន្តម៉ាកឡិចស៊ីសRX300 ពណ៌ទឹកប្រាក់ ពាក់ស្លាកលេខ បន្ទាយមានជ័យ2B.2808 ដែលកំពុងបត់បញ្ច្រាស បណ្តាលឲ្យម្ចាស់ម៉ូតូរងរបួសធ្ងន់តែម្តង។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ និងបាន ហៅរថយន្តមន្ទីរពេទ្យបង្អែកដឹកទៅសង្គ្រោះភ្លាមៗផងដែរ។ ចំណែករថយន្ត និងម៉ូតូ ត្រូវបាននាំយកមករក្សាទុកនៅអធិការដ្ឋាននគរបាលក្រុងប៉ោយប៉ែត រង់ចាំដោះស្រាយនៅពេលក្រោយ៕
មតិយោបល់