ស្វាយរៀងៈ ករណីគ្រោះថ្នាក់ចរាចរណ៍មួយ រវាងរថយន្តដឹកដី បុកនិងម៉ូតូមួយគ្រឿងពេញទំហឹង បណ្ដាលឲ្យកិនស្លាប់បុរសម្នាក់ នៅលើដងផ្លូវជាតិលេខ១ ត្រង់ចំណុចភូមិសាមគ្គី សង្កាត់ស្វាយតឿ ក្រុងស្វាយរៀង។
ជនរងគ្រោះឈ្មោះ ហេង អាយុ៤១ឆ្នាំ រស់នៅភូមិបន្ទាយ ឃុំកណ្ដៀងរាយ ស្រុកស្វាយទាប មុខរបជាអ្នកលក់សាច់គោ។ រថយន្តបង្កពាក់ស្លាកលេខ កំពង់ចាម 3A-5 751 បើកបរដោយបុរសឈ្មោះ ពត ដឹម អាយុ៣៤ឆ្នាំ មុខរបរបើករថយន្ត បច្ចុប្បន្នរស់នៅភូមិព្រៃគគីរ ឃុំព្រៃគគីរ ស្រុកចន្ទ្រា ខេត្តស្វាយរៀង។
សមត្ថកិច្ចបានឲ្យដឹងថា នៅមុនពេលកើតហេតុ គេឃើញរថយន្តដឹកដីមួយគ្រឿង បើកយ៉ាងលឿន ធ្វើដំណើរពីទិសខាងលិចឆ្ពោះទៅកើត លុះដល់ចំណុចកើតហេតុ ស្រាប់តែមានម៉ូតូពីរគ្រឿង បានបើកវ៉ាគ្នាក៏រេចង្កូតចូលចំផ្លូវរថយន្ត ដែលកំពុងតែបើកបរស្របទិសដៅគ្នា បណ្ដាលឲ្យបុកពេញទំហឹង ដោយរថយន្តអូសជាង៣០ម៉ែត្រ ទើបជាន់ប្រាំងជាប់ ធ្វើឲ្យភាគីខាងម៉ូតូធ្លាយពោះវៀន ស្លាប់ភ្លាមៗតែម្តង។
ក្រោយពេលកើតហេតុ វត្ថុតាងម៉ូតូ និងរថយន្ត រួមទាំងតៃកុងត្រូវបានសមត្ថកិច្ចឃាត់ខ្លួនយកទៅអធិការរដ្ឋានស្រុកស្វាយទាប ដើម្បីរង់ចាំដោះស្រាយតាមនីតិវិធីច្បាប់។ ចំណែកសព បានប្រគល់ឲ្យទៅគ្រួសារយកទៅធ្វើបុណ្យតាមប្រពៃណី៕
មតិយោបល់