កណ្តាលៈ កម្លាំងអធិការដ្ឋាននគរបាលស្រុកកោះធំ ​​​បង្ក្រាបល្បែងស៊ីសងតាមដងផ្លូវជាតិលេខ២១ ​ដោយ​បំបែកសំបុកកន្ទុយលេខ៣កន្លែង និងឃាត់ខ្លួនជនសង្ស័យ៣នាក់ កាលពីវេលាម៉ោង​២:០០រសៀលថ្ងៃទី០២ ខែកក្កដា ឆ្នាំ២០១៦ ត្រង់ចំណុច ភូមិព្រែកប៉ុក ភូមិចុងព្រែក និងភូមិព្រែកតាមេម ឃុំព្រែកស្តី ស្រុកកោះធំ ខេត្តកណ្តាល។

ប្រភព​ឲ្យដឹងថា ​ជនសង្ស័យទាំង៣នាក់ រួមមានៈ ទី១ឈ្មោះ ម៉ឺន វិន័យ ភេទស្រី អាយុ៤១ ឆ្នាំ ជន ជាតិខ្មែរ មានទីលំនៅក្នុងភូមិព្រែកប៉ុក ឃុំព្រែកស្តី ស្រុកកោះធំ។ ទី២-ឈ្មោះ សិន ទី ភេទស្រី អាយុ៤៨ ឆ្នាំ ជនជាតិខ្មែរ មានទីលំនៅៗភូមិព្រែកតាមេម ឃុំព្រែកស្តី ស្រុក កោះធំ ខេត្កណ្ដាល។ ទី៣-ឈ្មោះ ទ្រី សុង ភេទស្រី អាយុ៤៥ ឆ្នាំ ជន ជាតិខ្មែរ មានទីលំនៅៗភូមិចុងព្រែក ឃុំព្រែកស្តី។

ប្រភព​បន្តថា យោងតាមការសាកសួរ ឈ្មោះ ម៉ឺន វិន័យ និងឈ្មោះ ទ្រី សុង គឺបានសារភាពថា ខ្លួនបានកត់កន្ទុយលេខពិតប្រាកដមែន ហើយខ្លួនបានកត់យកទៅឲ្យឈ្មោះ គត ហ៊ត ភេទស្រី អាយុ៦៧ឆ្នាំ ជនជាតិខ្មែរ មានទីលំនៅភូមិព្រែកប៉ុក ឃុំព្រែកស្តី ស្រុកកោះធំ ខេត្ត កណ្តាល។ ចំណែកឈ្មោះ សិន ទី សារភាពថា ខ្លួនពិតជាបានកត់កន្ទុយលេខពិតប្រាកដមែន ហើយខ្លួនកត់ស៊ីសងខ្លួនឯង ពុំបានកត់ឲ្យអ្នកណាឡើយ។

​បច្ចុប្បន្ន ជនសង្ស័យទាំង០៣នាក់ ត្រូវបាន​បញ្ជូនខ្លួនរួមទាំងវត្ថុតាងផ្សេងៗ មកកាន់អធិការដ្ឋាន ដើម្បីធ្វើការសាកសួរ និងបន្តចាត់ការតាមនីតិវិធី៕