ព្រៃវែងៈ អនិច្ចាក្មេងស្រីមិនទាន់ដឹងក្តី ត្រូវមច្ចុរាជឆក់យកជីវិត ខណៈជីដូនមិនប្រយ័ត្ន ទុកចៅស្រីក្បែរមាត់ទឹក ស្រាប់តែធ្លាក់ចូលក្នុងបឹងទឹកស្លាប់គួរឲ្យអាសូរ កាលពីវេលាម៉ោង៣និង៣៥នាទី ថ្ងៃទី៣ ខែកក្កដា ឆ្នាំ២០១៦ នៅភូមិតាឡើក ឃុំអង្គរទ្រេត ស្រុកស្វាយអន្ទរ ខេត្តព្រៃវែង។
ប្រភពឲ្យដឹងថា ហេតុការណ៍ខាងលើនេះ បានកើតឡើង ខណៈក្មេងស្រីរងគ្រោះ ឈ្មោះ ស្រី ណាក់ អាយុ៤ឆ្នាំ រស់នៅជាមួយជីដូន ដោយម្តាយឪពុកទៅធ្វើការរោងចក្រនៅឯទីក្រុងភ្នំពេញ ទុកឲ្យជីដូនមើលថែ។
ប្រភពបន្តថា នៅថ្ងៃកើតហេតុ ជីដូននិងចៅ បាននាំគ្នាទៅចូកចកយកឲ្យត្រីស៊ី រួចត្រឡប់មកដល់ផ្ទះវិញ យកចកមកដាក់មាត់បឹង ក៏ទុកចៅ និងទៃចកនៅក្បែរនោះ រួចក៏បណ្តើរម៉ូតូយកមកទុកនៅផ្ទះវិញ។ ចំណែកឯ ចៅនៅទីនោះ ក៏ជិះទៃច្រកចករអិលធ្លាក់ចុះក្នុងបុង ជីដូនមកដល់មិនឃើញចៅ ក៏ស្រែកឆោឡោ ហៅអ្នកស្រុកឲ្យជួយផង ចៅខ្ញុំធ្លាក់ចូលទឹកហើយ ស្រាប់តែបង្កការភ្ញាក់ផ្អើលអ្នកជិតខាងនាំគ្នាចុះក្នុងទឹកបុង ខ្លះយកអួនមកអូស ដើម្បីរកកុមារីដែលបានធ្លាក់ទឹកបុង ក្រោយមកក៏រកឃើញនៅបាតបុងជម្រៅ៤ម៉ែត្រ ហើយយកក្មេងស្រីរងគ្រោះមកផ្ទះដុះលាងសំអាតដីប្រឡាក់ខ្លួន រួចបញ្ជូនក្មេងរងគ្រោះទៅសង្គ្រោះនៅមន្ទីរពេទ្យឯកជនស្វាយអន្ទរ តែជាអកុសល ក្មេងរងគ្រោះផុតដង្ហើមទៅហើយ។
បច្ចុប្បន្ន សពក្មេងរងគ្រោះត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
មតិយោបល់