សៀមរាប: កាលពីវេលាម៉ោង១និង៤០នាទីយប់ រំលងអធ្រាត្រឈានចូលថ្ងៃទី២៣ ខែវិច្ឆិកា ឆ្នាំ២០១៨ មានករណីបុរសម្នាក់ត្រូវបានឪពុកកាប់សម្លាប់ រួចអូសយកសាកសពទៅទម្លាក់នៅក្នុងស្រះទឹក រួចរត់គេចខ្លួនបាត់ស្រមោល នៅភូមិព្រីង ឃុំជីក្រែង ស្រុកជីក្រែង ខេត្តសៀមរាប។
ជនរងគ្រោះមានឈ្មោះ ស៊ុន ថា ភេទប្រុស អាយុ២៩ឆ្នាំ (វិកលចរិតសសៃប្រសាទ)។
លុះព្រឹកថ្ងៃខែឆ្នាំដដែល សមត្ថកិច្ចបានចុះដល់កន្លែងកើតហេតុដើម្បីស្រាវជ្រាវ ហើយបើតាមសាក្សីបានឲ្យដឹងថា ឈ្មោះស៊ិន ធុល ភេទប្រុស អាយុ៥៥ឆ្នាំ បានកាប់ និងវាយ កូនរបស់ខ្លួន នៅចំណុចលើថាសជណ្តើរផ្ទះរបស់ខ្លួន រួចហើយអូស ជនរងគ្រោះទៅខាងក្រោយផ្ទះបាត់ លុះដល់ម៉ោង២យប់ក្នុងថ្ងៃដដែល ឈ្មោះស៊ិន ធុល និងប្រពន្ធ ឈ្មោះស៊ិន ឈន់ដែលត្រូវជាឪពុកម្តាយជនរងគ្រោះ បានចាកចេញពីផ្ទះតែម្តង។
ចំពោះសាកសពបានរកឃើញនៅក្នុងទឹកស្រះក្រោយផ្ទះកើតហេតុ នៅវេលាម៉ោង១០និង៣០នាទីព្រឹក ថ្ងៃទីខែឆ្នាំដដែល នៅលើសាកសពឃើញស្នាមកាប់និងកាំបិតត្រូវមួយកន្លែងត្រង់លើត្រចៀកខាងឆ្វេង និងលើក្បាលហើមជាំ។
ករណីនេះមុខសញ្ញាសង្ស័យគឺ ឪពុកបង្កើត ដែលខឹងនិងកូនធ្វើសកម្មភាព ចង់ដុតផ្ទះបំផ្លាញទ្រព្យក្នុងផ្ទះ ថែមទាំងវាយឪពុកម្តាយជាច្រើនលើក កាលពីកន្លងមក។
ករណីនេះសមត្ថកិចកំពុងបន្តនីតិវិធីច្បាប់៕
មតិយោបល់