ភ្នំពេញ: ជនសង្ស័យ២នាក់ បានជិះម៉ូតូមួយគ្រឿងឌុបគ្នា ទៅធ្វើសកម្មភាពឆក់ទូរស័ព្ទ Iphone 6Plus ពីយុវតីម្នាក់ ដែលកំពុងជិះម៉ូតូនិយាយទូរស័ព្ទតាមផ្លូវ បានសម្រេច តែពេលជិះម៉ូតូគេចខ្លួន ក៏ជ្រុលទៅបុកប៉ះរថយន្តមួយគ្រឿង ហើយព្យាយាមជិះរត់បន្តទៀត លុះមកដល់ជិតសាលាដំបូងរាជធានីភ្នំពេញ ស្រាប់តែម៉ូតូរលត់ ជិះទៅមុខលែងរួច ទើបត្រូវបានប្រជាពលរដ្ឋនាំគ្នាជួយចាប់ឃាត់ខ្លួនបានម្នាក់ និងរាយការណ៍ប្រាប់សមត្ថកិច្ចចុះមកវាយខ្នោះយក ទៅសាកសួរនៅប៉ុស្តិ៍ភ្លាមៗតែម្ដង។
ហេតុការណ៍នេះ បានកើតហេតុនៅម៉ោង១០ និង១០នាទីយប់ ថ្ងៃសៅរ៍ទី០១ ខែវិច្ឆិកា ឆ្នាំ២០១៨ ត្រង់ចំណុចស្តុបផ្លូវ២១៥ កែងផ្លូវ១៨២ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។
ជនសង្ស័យឈ្មោះ ថន ដារ៉ាគង់ អាយុ២៧ឆ្នាំ មុខរបរដើរលក់ខោអាវតាមផ្សារ មានទីលំនៅម្ដុំបឹងកេងកងទី៣ ខណ្ឌចម្ការមន (ជាអ្នកបើកម៉ូតូ) និងបក្ខពួកម្នាក់ទៀត (ជិះពីក្រោយនិងជាអ្នកធ្វើសកម្មភាព) ឈ្មោះ រិទ្ធ អាយុប្រហែល២៥ឆ្នាំ បានរត់គេចខ្លួនបាត់។
យុវតីរងគ្រោះអាយុ២០ឆ្នាំ មុខរបរធ្វើការភោជនីយដ្ឋានមួយ នៅក្នុងខណ្ឌ៧មករា ស្នាក់នៅក្នុងខណ្ឌសែនសុខ។ ចំពោះទូរស័ព្ទ Iphone 6Plus ដែលត្រូវបានជនសង្ស័យឆក់យកពីជនរងគ្រោះ ត្រូវបាន សមត្ថកិច្ចប្រគល់ជូនម្ចាស់ដើមវិញ។
តាមសម្ដីយុវតីរងគ្រោះ បានឲ្យដឹងថា នៅមុនពេលកើតហេតុ រូបនាងបានបើកម៉ូតូមួយគ្រឿង ម៉ាក Zoomer-X ស៊េរីឆ្នាំ២០១៨ តែម្នាក់ឯង ចេញពីធ្វើការបំណងទៅផ្ទះ ដោយធ្វើដំណើរតាមបណ្ដោយផ្លូវ២១៥ ទិសដៅពីជើងមកត្បូង ដោយខណ:នោះនាង កំពុងនិយាយទូរស័ព្ទ លុះមកដល់ចំណុចស្តុបផ្សារដេប៉ូ ស្រាប់តែមានជនសង្ស័យ២នាក់ ជិះម៉ូតូសង់កូរ៉េ Plus មួយគ្រឿង (ស៊េរីចាស់) ពណ៍ក្រហម ពាក់ស្លាកលេខភ្នំពេញ 1AM-7834 មកអែបពីក្រោយក្បែរនាង ហើយធ្វើសកម្មភាពឆក់ទូរស័ព្ទរបស់នាង បានសម្រេច ភ្លាមនោះជនសង្ស័យ បានព្យាយាមបកត្រលប់ក្រោយដើម្បីជិះគេចខ្លួន ទើបនាងស្រែក «ចោរៗ» ឆោឡោផ្អើលដល់ប្រជាពលរដ្ឋនាំគ្នា ជួយដេញតាមផងដែរ។
នារីរងគ្រោះបន្ថែមទៀតថា ភ្លាមនោះនាង ក៏បានជិះមកតាមជាមួយប្រជាពលរដ្ឋដែលជាអ្នកជិះដេញតាមនោះដែរ ហើយឃើញជនសង្ស័យ ដែលបានជិះម៉ូតូគេចខ្លួន ទៅបុកប៉ះរថយន្តមួយគ្រឿង ហើយព្យាយាមជិះរត់បន្តទៀត ដោយបោះទូរស័ព្ទចូលក្រោមរថយន្ត ដែលចតអែបចិញ្ចើមផ្លូវ លុះមកដល់ជិតសាលាដំបូងរាជធានីភ្នំពេញ ស្រាប់តែម៉ូតូជនសង្ស័យរលត់ ជិះទៅមុខលែងរួច ទើបត្រូវបានប្រជាពលរដ្ឋនាំគ្នាតាមមកទាន់ជួយចាប់ឃាត់ខ្លួនបានម្នាក់ ដែលជាអ្នកបើកម៉ូតូ ចំណែកអ្នកជិះពីក្រោយ ដែលជាអ្នកធ្វើសកម្មភាព បានរត់គេចខ្លួនបាត់ស្រមោល។
ជនសង្ស័យ ត្រូវបាននាំខ្លួនមកទីស្នាក់ប៉ុស្តិ៍នគរបាលវាលវង់ នៃអធិការដ្ឋាននគរបាលខណ្ឌ៧មករា ដើម្បីកសាងសុំណំរឿង ចាត់ការទៅតាមផ្លូវច្បាប់៕
មតិយោបល់