ភ្នំពេញ: រថយន្តកូរ៉េ២តោនកន្លះមួយគ្រឿង ដឹកអេតចាយពេញរថយន្តហើយបានក្រឡាប់ផ្ងារជើងចាក់ចោលពេញផ្លូវ សំណាងមិនមានមនុស្សរងរបួស។
ហេតុការណ៍នេះបានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី៧ ខែធ្នូ ឆ្នាំ២០១៨ ចំណុចក្រោយវត្តតាភេម ភូមិខ្វាវ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាកកូរ៉េ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3A-7519 ដឹកអេតចាយពេញរថយន្ត ធ្វើដំណើរតាមបណ្តោយផ្លូវលំ ក្នុងទិសដៅពីជើងទៅត្បូង ដោយសារតែផ្លូវមានស្ថានភាពទ្រុឌទ្រោមពេកជង្ហុកធំៗច្រើនធ្វើឲ្យរថយន្តផ្អៀងមួយចំហៀង ក្រឡាប់ផ្ងារជើងចាក់អេតចាយចោលពេញផ្លូវតែម្តង តែសំណាងមិនមានមនុស្សរងរបួស។
ក្រោយកើតហេតុដោយសារតែមិនមានប៉ះពាល់ដល់អាយុជីវិតមនុស្ស និងទ្រព្យសម្បត្តិអ្នកជិតខាងទើបប្រគល់រថយន្តឲ្យម្ចាស់ទៅជួសជុលវិញ។
សូមបញ្ជាក់ ផ្លូវខាងលើមានស្ថានភាពទ្រុឌទ្រោមយ៉ាងខ្លាំងជាយូរមកហើយ ប៉ុន្តែអាជ្ញាធរនៅមិនទាន់មានវិធានការនៅឡើយទេ៕
មតិយោបល់