Post News Media ព័ត៌មានជាតិ អុញនោះ! កម្មក...

អុញនោះ! កម្មកររោងចក្រស៊ី ធី ស៉្បាក ធ្វើកូដកម្ម ត្រូវថៅកែជួលក្មេងស្ទាវមកកាង!!!

ភ្នំពេញ: ក្មេងស្ទាវ ជើងកាង ក្រុមអ្នកលេងប្រមាណជាង១០នាក់ ប្រដាប់ដោយចប ប៉ែល ដំបង ញញួរ ត្រូវបានកម្មកររោងចក្រជាង៥០០នាក់ អះជាងថា ថៅកែរោងចក្រ ស៊ី ធី ស៉្បាក ជួលមកបង្កហិង្សាវាយមកលើកម្មករអំឡុងពេល ធ្វើកូដកម្ម ទាមទារលក្ខខណ្ឌប្រយោជន៍ កាលពីព្រឹក ថ្ងៃទី១៨ ខែធ្នូ ឆ្នាំ២០១៨ ស្ថិតនៅខាងមុខរោងចក្រ ដេរកាបូប ស៊ី ធី ស៉្បាក ផ្លូវលំ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

តាមកម្មករ បានឲ្យដឹងថា រោងចក្រដេរកាបូបខាងលើ មានកម្មករបម្រើការងារសរុបចំនួនជាង៥០០នាក់ ដោយសារថៅកែក្រុមហ៊ុន មិនបានគោរពលក្ខខណ្ឌការងារ ដែលក្រសួងដាក់ចុះ ទើបនៅព្រឹកថ្ងៃទី១៨ ខែធ្នូ នេះកម្មករទូទាំងរោងចក្រ មិនសុខចិត្ត ប្រមូលផ្តុំគ្នា ធ្វើកូដកម្មទាមទារលក្ខខណ្ឌប្រយោជន៍ ១២ចំណុច ។

កម្មករបន្តទៀតថា ខណ:ដែលក្រុមកម្មករ កំពុងធ្វើការតវ៉ា ស្រាប់តែលេចមុខ ក្រុមក្មេងស្ទាវ ជើងកាង សង្ស័យ ខាងថៅកែរោងចក្រ ជួលមកប្រដាប់ដោយ ចប ប៉ែល ដំបង ញញួរ ដេញវាយ សំពង មកលើកម្មករ បង្កឲ្យមានអ្នករងរបួស ផ្អើលឆោឡោ ទាំងសមត្ថកិច្ច ទាំងអាជ្ញាធរ ចុះទៅអន្តរាគមន៍ តែក្រុមក្មេងស្ទាវ ជើងកាងទាំងនោះ នាំគ្នារត់គេចខ្លួនបាត់អស់ ។

ការតវ៉ា របស់បងប្អូនកម្មកររោងចក្រខាងលើ រហូតមកដល់ល្ងាចថ្ងៃដដែលនេះ មិនទាន់មានដំណោះស្រាយ កម្មករ នៅបន្តប្រមូលផ្តុំ ខាងមុខរោងចក្រ ៕